DILI (timorpost.com) — Uma Kreda Katólika Timor-Leste liuhusi Dom Virgílio Cardeal do Carmo da Silva, husu timoroan sira atu fó liman ba malu, kria ambiente ne’ebé di’ak, hodi hasoru Eleisaun Parlamentár (ElPar) 2023.
“Ha’u-nia preokupasaun mak ida ne’e, saida no oinsá mak bele hamutuk fó liman ba malu, atu nune’e bele kria ambiente ne’ebé di’ak, para hasoru Eleisaun Parlamentár,” nia hateten hafoin enkontru ho Prezidente Komisaun Nasionál Eleisaun (CNE), José Belo, iha Lecidere, Kinta (02/02).
Nia dehan, Timor-leste agora tama ona ba Eleisaun Parlamentár, entaun preparasaun ne’e mak sai objetivu ida ba iha Prezidente CNE ho nia komitiva mai aprezenta uitoan kona-ba saida ka oinsá maka Uma-Kreda mós bele hamutuk hodi promove liután Páz no Estabilidade.
Alende ne’e mós parte Uma-Kreda ko’alia kona-ba iha ElPar 2023 ne’e evita insulta malu sira, primeiru hanesan programa ida husi Komisaun Nasionál nian ne’ebé hanoin ona atu halo semináriu boot ida, ho konteudu ka objetivu kona-ba semináriu ne’e nian mak atu trata kona-ba oinsá ema hotu-hotu bele kria Páz no Estabilidade.
“Kona-ba ida ne’e husi parte Uma-Kreda nian hatudu ami-nia disponibilidade hodi partisipa atu bele kontribui buat ne’ebé husi Uma-Kreda, tanba agora foin to’o iha planu jerál no seidauk detallu, maibé nia objetivu ida atu hala’o semináriu ida, tanba ne’e husi parte Igreja prontu partisipa para bele kontribui ba ida ne’e,” nia hateten.
Nia aumenta, parte Uma-Kreda Katólika ho CNE ko’alia kona-ba parte Uma Kreda nian ne’ebé bele ko’alia ho Konferensista Episkopal, atu nune’e bele husu hodi halo orasaun ida ba Eleisaun Parlamentár 2023 nian.
“Orasaun ne’e, iha antes ita lidera ita-nia kampaña ou eleisaun, sei fahe ba Parókia hotu-hotu no sarani hotu-hotu, atu kada Domingu ita reza ou iha kalan família sira bele reza,” Cardeal dehan.
Nia dehan, iha hanoin mós posibilidade ida iha loron ida ne’ebé atu dehan loron silensiu nian, husi Dioseze to’o Parókia hodi realiza missa ida iha oras ne’ebé hanesan ho objetivu mak molok hakat ba eleisaun nian.
“Iha parte hanesan toman baibain nian husi Uma-Kreda sempre iha mós Komisaun Justisa e Páz, Kriasaun Integridade nian sira mós hala’o ona atividade ida ne’e hanesan halo Edukasaun Sivika no mós halo monitorizasaun ba iha eleisaun nian para nune’e bainhira iha eleisaun, parte husi Igreja mós halo no husi ne’e Uma-Kreda kontinua nafatin prontu atu hala’o serbisu ida ne’e,” Dom Virgílio hakotu.
2,405 total views, 6 views today
Bele hare Video Seluk :
Subscribe to Timorpost
