DILI— Festa demokrasia eleisaun parlamentar 2023 remata ona, povu timoroan tomak tenke hamutuk hodi simu rezultadu eleisaun ho pas no hakmatek, tanba ho ida ne’e de’it maka bele lori nasaun la’o ba oin.
“Iha momentu ida ne’e momentu espiritu santu nian, ita husu atu Maromak espiritu santu loke povu nia fuan hodi simu rezultadu eleisaun ida nee ho paz no hakmatek iha espiritu Santu,” Bispu foun Dioceze Baukau, Dom Leandro Maria Alves, haklaken lia hirak ne’e durante dirije misa iha Igreja Nossa Senhora Imaculada da Conçeição Katedral, Villa Verde, Domingo (28/5).
Nia husu ba timoroan sira hotu atu sai na’in ba pas hodi bele haboot no enkoraja ema hotu atu sai povu ida de’it, povu ida ne’ebé unidu. Husi povu nia unidu sei lori moris hakmatek ba povu no ba nasaun.
“Hanesan na’in Jesus Kristu dehan hakmatek hela ho imi, atu ema hotu bele hakmatek, laos hakmetek dehan la halo buat ida, maibe husi hakmatek ida ne’e atu ema ida-idak tau kapasidade no talentu hamutuk, hodi bele dezenvolve rai ida ne’e,” nia hatete.
Tuir rezultadu apuramentu nasionál ne’ebé Komisaun Nasional Eleisaun (CNE-sigla Portugés) anunsia iha sabadu, (27/05) hatudu katak partidu CNRT maka manan no hetan votus 288.101, ho 41.62%, kadeira 31, tuir patidu Fretilin ho votus 178.248, ho 25.75%, kadeira 19.
Tuir fali partidu demokratiku hetan votus 64.493, 9.32%, kadeira 6, partidu Khunto votus 52.021, 7.52%, kadeira 5 no partidu libertasaun popular ho votus 40.696, 5.88%, kadeira 4.
Entretantu hosi rezultadu apuramentu nasional ne’ebé CNE publika ona, sei submete ba iha Tribunal Rekursu, no tuir lei tribunal iha tempu oras 72 hodi valida.
1,277 total views, 3 views today
Bele hare Video Seluk :