Dili (Timor Post) – Governu Timor-Leste liuhusi Ministra Negósiu Estranjeiru no Kooperasaun, Adaljiza Magno, husu ba sidadaun timoroan sira iha Portugal ne’ebé toba iha Jardín, atu hakbesik an ba iha Embaixada Timor-Leste nian hodi bele ajuda buka fatin serbisu, no halo lobi ba Governu Portugál.
Nia hatete, uluk sira seidauk enfrenta problema sériu, Governu Timor-Leste liuhusi Embaixada Timor nian iha Portugál, hatete fila-fila ba sira katak, hakbesik an ba iha Embaixada, hodi hatete kondisaun, hela iha ne’ebé, serbisu saida, agora halo rejistu ka lae, maibé ema hira oan de’it mak mosu ba, sira seluk ta’uk karik, lahatene sé mak hatete ba sira atu labele mosu bá, mais sira la mosu ba mak to’o agora sasán sériu liu, ema lakohi simu sira atu serbisu.
“Agora apelu husi Governu ba sira ida de’it, hakbesik an ba iha Embaixada atu bele ajuda buka fatin serbisu, para bele halo lobi ba Governu Portugál, hodi bele ajuda haree sira-nia kondisaun, tanba sira la rejistu ba seguransa sosiál, husi ida ne’e sira ne’ebá fulan neen (6) de’it sira-nia vistu mate ona, depois ba iha ne’ebá la’ós ema ida, ou ajénsia ida ne’ebé akreditadu lori ba mak sai hanesan ne’e, ba mós selu osan la loos,” nia hateten hafoin partisipa iha Serimónia Aniversáriu Ezisténsia ASEAN nian ba dala-55, iha Embaixada Tailándia iha Motaél, Segunda (15/08).
Nia dehan, apelu dala ida tan husi Governu, kuandu laiha serteza lalika ba, hela de’it iha ne’e, buka lai serbisu. Imi haree ka lae iha sosiál média, MNEK halo posting barak loos, esforsu Governu nian liuhusi MNEK lobi país barak atu akumula Timoroan sira ne’ebé hakarak ba serbisu iha rai li’ur.
Maibé la’ós fasil, hanesan Inglaterra, sira laiha akordu bilateral ne’ebé bele fasilita, sira iha ne’e mak ema hotu-hotu bele aplay de’it ho kompetisaun ho país sira seluk, entaun ida ne’e la fasil, tanba Timor-Leste nia Unskilled mak barak.
“Agora Portugál ita tenta atu halo hela negosiasaun, se sira aseita ita bele iha akordu tempu badak, entaun bele fasilita, maibé la’ós fasilita husi Governu, ou laiha akordu ruma ho instituisaun ou organizasaun ruma ne’ebé impertense ba, lalika ba,” nia informa.
Enkuantu kona-ba Timoroan ne’ebé agora rejista iha Portugál, tuir Ministra ne’e laiha serteza ba númeru, mais iha balu de’it, la barak ida.
2,315 total views, 3 views today
