DILI—Partidu FRETILIN ho CNRT nu’udar partidu ne’ebé iha asentu boot liu iha uma fukun Parlamentu Nasionál ho kadeira tau hamutuk 44 (FRETILIN 23, CNRT 21). Liga ho situasaun polítika atual presiza tebes iha forsa polítika ida hodi fó garantia ba estabilidade governativa. Nune’e, sinál di’akliu ba Timor Leste maka partidu rua ne’e toma ona responsabilidade.
“Ita bele agradese ba líder na’in-rua ne’e. Ne’e ita bele dehan situasaun polítika durante ne’e bele solusiona ona iha tempu badak nia laran. CNRT ho FRETILIN hamutuk ne’e ideal liu, orsamentu ba iha parlamentu mós laiha problema, ejekusaun programa governu nian mós laiha problema,” Reitór Universidade da Paz (UNPAZ), Adolmando Soares Amaral hatete ba Timor Post via telefone, Tersa (28/04/2020), relasiona ho situasaun polítika rai laran ne’ebé tinan barak ona la estavel no tuir informasaun Sekretáriu Jerál FRETILIN, Marí Bim Amude Alkatiri ho Prezidente CNRT, Kayrala Xanana Gusmão atu hasoru malu hodi hateke ba oin.
Maske nune’e, Adolmado subliña, líder rua ne’e tenke ho fuan boot. Iha polítika ohin bele akontese buat ida, aban bele akontese buat seluk.
“Iha polítika iha posibilidade hotu. Ita haree ida pior liu estetmentu sira ne’e mós agora sei bele hamutuk, nusa mak ida ne’e labele akonte. Ha’u hanoin sira tenke haluha buat ne’ebé ba kotuk, sira tau interese povu no rai ida ne’e aas liu hodi la’o ba oin,” Adolmado salienta.
Entretantu Reitór UNPAZ ne’e mós subliña, atu solusional impase polítika durante ne’e iha senáriu oioin, iha ne’ebé governu ne’ebé lidera hela husi Taur Matan Ruak husi PLP, maske laiha Orsamentu Jerál Estadu (OJE) ba tinan 2020 nian, maibé nafatin la’o tanba seidauk iha desizaun polítika liga ho konstituisaun husi Prezidente Repúblika Francisco Guterres Lú Olo, nune’e mós tanba pesti corona (COVID-19) ne’ebé sai preokupasaun mundiál i obriga Timor Leste mós tenke sériu iha asaun sira kombate minimiza impaktu sira ba ekonomia no sosial.
“Ha’u hanoin iha posibilidade mós partidu ki’ik sir abele apoiu partidu boot sira par abele garante estabilidade governativa. Naran katak sira ida-idak husik hela sira nia arogánsia, buka atu rona malu, depois tau interese povu nian mak a’as liu,” Adolmado dehan.
Nia hatutan, to’o agora aliansa ida ne’ebé forma governu daualu mós la augenta, aliansa daruak ne’ebé atu garante maioria iha parlamentu mós la konsege, iha fali aliansa ida ne’ebé FRETILIN ho PLP agora la’o hela. Sira ne’e hotu tanba de’it líder sira hotu hamrook ba poder.
“Sé sira la hamrook ba poder, sira tuur hamutuk, sira tau interese povu no nasaun nian ba oin, sira buka intende malu, maka sira bele solusiona problema nasaun nian ho di’ak liu,” Adolmado hatete.
Governu atual ne’ebé hari’i husi CNRT, PLP ho KHUNTO, maske de faktu nakfera ona, maibé mós sei hetan apoiu husi FRETILIN no sinál hatudu mós husi KHUNTO no partidu sira seluk liuliu tau hamutuk forsa ba luta hasoru COVID-19.
Entretantu antes ne’e, Sekretáriu Jerál FRETILIN, Marí Bim Amude Alkatiri hatete, ohin loron partidu boot ida la manan maioria absoluta halo partidu kiik sira mak sai determinante.
Referénsia hatudu momoos iha tinan 2007 partidu boot FRETILIN ho CNRT la manan maioria absoluta. CNRT tenke dada partidu kiik sira hodi ukun hamutuk, nune’e mós iha tinan 2012, no iha tinan 2017 FRETILIN la konsege lidera governu to’o rohan tanba KHUNTO halai sai.
Tanba ne’e, Alkatiri subliña, FRETILIN prepara ba eleisaun tuir mai manan maioria absoluta hodi nune’e lidera ukun maka hamosu governu inkluzaun.
“Manan maioria absoluta mesak depois mak halo inkluzaun, haree ba ohin loron, partidu boot ida la manan maioria absoluta, partidu ki’ik mak sai fali determinante,” Alkatiri subliña. (cao)
946 total views, 3 views today
Bele hare Video Seluk :
Subscribe to Timorpost
