Dili, (timorpost.com)—Ekipa Asosiasaun HAK realiza audiénsia ho Parlamentu Komisaun A ne’ebé trata Asuntu Justisa no Konstitusionál hodi hato’o deskobrimentu husi rezultadu monitorizasaun prizaun tolu (Bekora, Gleno no Suai).
Vise diretór Asosiasaun HAK, Antónino de Limas hatete, HAK kontinua tau matan ba asuntu justisa formál nia lala’ok, relasiona ho direitu prizioneiru sira-nian atu hetan prosesu justisa ne’ebé mak justu.
“Deskobrimentu husi prizaun tolu ne’ebé ekipa HAK hala’o situasaun balu hatudu iha prizaun liu-liu ba Infraestrutura la saudavel, Prizaun tolu ne’e rasik tinan 22 ukun an prizaun ne’e mai husi lembransa ne’ebé Indonézia husik hela”. Dehan Vise Diretór HAK, Antónino de Limas, ba jornalista sira iha Komisaun A Parlamentu Nasionál, Kinta (18/04/2024).
Vise diretór HAK ne’e haktuir, tinan barak ona uma kadeia sira ne’e so halo de’it manutensaun maibé loloos ne’e presiza harii prizaun foun ba bloku sira ne’ebé kondisaun di’ak liu.
“Durante ne’e saida mak HAK hare prizaun tolu ne’e nia kondisaun la di’ak ona halo manutensaun maibé nia kondisaun bele dehan presiza halo nia proposta karik bele harii prizaun foun ba bloku foun, Tanba kondisaun sira ne’ebé agora ne’e la di’ak ona ba tratamentu dignu ba prizioneiru sira”. Nia informa.
Problema seluk ne’ebé HAK identifika mak kapasidade ne’ebé iha sela ne’e ema barak liu, sela balun kuartu ida loloos ne’e ideal ema ida ou rua de’it, maibé nain-5 uza kuartu ida, ne’e situasaun ne’ebé HAK deteta.
“Problema kuarta iha Sela depois ekipamentu iha prizaun hanesan aparellu sira, CCTV, rádiu komunikasaun iha prizaun tolu ne’e laiha no mós kona ba ekipamentu transporte atu fasilita guarda prizaun ho prizioneiru sira bainhira halo julgamentu viajen husi Dili ba Suai mós menus no at”. Nia konta
Entaun ba asuntu ida transporte ne’e kuandu laiha ne’e difikulta ba servisu iha prizaun nian.
Iha akontese balun ne’ebé HAK identifika katak bainhira dadur husi Bekora guarda prizaun akompaña tuir julgamentu iha Oe-cussi, fila mai ho ro atu ba Bekora laiha karreta husi prizaun nia atu fasilita, entaun saida mak akontese ne’e dadur ho guarda prizaun ne’e sa’e taksi.
“Ha’u atu hatete katak kondisaun sira ne’e loloos la akontese hanesan ne’e ohin hato’o ona ba Presidente Komisaun A distintu Deputadu sira atu dehan kondisaun sira ne’e tratamentu ne’ebé loloos la bele akontese tanba ne’e lori risku ba guarda prizaun sira, ne’e hanesan sorte iha relasaun di’ak karik guarda prizaun ho dadur ne’e di’ak entaun sei laiha buat ruma ba guarda prizaun nia”. Hakotu
1,128 total views, 3 views today
Bele hare Video Seluk :