Dili (timorpost.com) — Sekretáriu Tékniku Administrasaun Eleitorál (STAE) finaliza ona resenseamentu eleitór foun, iha fulan Novembru 2022.
Diretór Jerál STAE, Acilino Manuel Branco, hatete iha tempu badak sira sei anunsia iha jornál repúblika kona-ba resenseamentu eleitór nian.
“Ha’u hato’o ona prosesu resenseamentu, antes ne’e ami hala’o ona iha nivel territóriu tomak, liuliu iha postu administrativu, tuir ita-nia planu traballu ita remata iha 30 Novembru”, nia hateten ba Timor Post iha knar fatin Kaikoli, Segunda (19/12).
Nia dehan, sira sei prolonga tan resenseamentu eleitór foun ne’e iha nivel munisípiu atu fó atendementu ba eleitór foun ne’ebé seidauk iha tempu atu ba rejistu.
Nia hatutan, servisu STAE ba resenseamentu eleitór foun hosi nivel postu administrativu ne’e rekolla ekipamentu STAE tula mai munisípiu hodi kontinua mai nasionál atu sinkroniza.
“Ita taka iha postu administrativu, ita lori ekipamentu sira ne’e mai munisípiu no kontinua mai iha STAE nasionál hodi halo sinkronizasaun ba rezultadu ne’ebé maka iha”, nia afirma.
Enkuantu STAE sei fó sai rezultadu resenseamentu ne’e ba públiku no sei fó sai mós iha jornál Repúblika iha tempu badak ne’e.
Eleitór foun ba eleisaun jerál 2023, ne’ebé STAE resenseia ne’e sidadaun sira ne’ebé iha fin de tinan 2022 ne’e atinji ona idade tinan 16, ne’ebé tinan oin tama ho idade tinan 17.
Eleitór foun provizóriu ne’ebé rejista ona to’o iha fulan Agostu ba kotuk, hamutuk rihun lima maka resensia ona, maibé dadus hosi Agostu to’o mai fin Dezembru seidauk fiksu.
2,377 total views, 3 views today
Bele hare Video Seluk :
Subscribe to Timorpost
