DILI (timorpost.com)—Votante sira iha Sentru Votasaun Aldeia Klak-Fuik, Suku Bekora kestiona atendimentu staff Sekretariadu Téknika Administrasaun Eleitorál (STAE), ne’ebé tarde, no manual afeta komunidade barak la vota.
Tuir observasaun Timor Post ba prosesu eleisaun sira iha Sentru Votasaun Aldeia Klak-Fuik, komunidade sira ne’ebé ezerse sira nia direitu votu, kestiona atendimentu iha Sentru votasaun ne’e loke tarde liu iha oras 09:00, nune’e to’o iha tuku 13:50, kuaze komunidade barak la fó sira nia votu.
Aleinde ne’e komunidade sira mós kestiona, pesoál STAE ne’ebé tuur iha meza ema na’in tolu, ida simu votante nia kartaun eleitorál no hakerek, ida less bulletin de votu tau karimbu no ida seluk alista prosesu votasaun ba votante sira, prosesu atendimentu ne’e manual entaun ha tarde prosesu votasaun iha sentru votasaun Aldeia Klak-Fuik.
Bainhira Timor Post rekolla informasaun kona-ba preokupasaun komunidade sira nian, atual Xefe Aldeia Klak-fuik, Almerindo Almeriante Teodóziu, rekoñese prosesu atendimentu staff STAE ba eleitór sira ne’e kleur, pior liu tan votasaun ne’e foin maka hahú iha oras 09:00.
“Ita nia komunidade sira ohin balu mai ko’alia kona-ba prosesu atendimentu ne’e kleur, tanba sá staff STAE la-aumenta, ema na’in tolu de’it ho manual ka hakerek ne’e mak halo tarde prosesu votasaun, no ohin abertura ne’e iha oras tuku 9:00 foin vota, ”, Atual Xefe Aldeia Klak-Fuik Suku Bekora, Almerindo, informa, iha Sentru Votasaun Aldeia Klak-Fuik, Sábadu, (28/10).
Kuaze metade hosi populasaun aldeia Klak-fuik 3000 resin ne’e seidauk ezerse ninia votu, tanba ne’e dala ruma to’o kalan mós votasaun iha sentru votasaun Aldeia Klak-fuik seidauk konklui.
Enkuantu prosesu eleisaun ida ne’e hetan seguransa hosi membru Polísia, hosi eskuadra Kristu-Rei nian ne’ebé dezde material eleisaun to’o iha sentru votasaun koloka kedas membru PNTL hodi fó seguransa ate anunsia rezultadu eleisaun.
Sentru votasaun iha Suku Bekora, tuir informasaun hosi parte tékniku STAE balu informa katak, Aldeia 10 iha Suku Bekora monta sentru votasaun ida-idak entaun sentru votasaun 10 maka monta iha Suku Bekora.(*)
1,807 total views, 3 views today
Bele hare Video Seluk :
Subscribe to Timorpost
