DILI, (timorpost.com)— Iha selebrasaun Domingu resurisaun, Padre Domingos Soares ‘Maunbere’, observa katak durante semana Santa hahú husi Sesta-feira Santa to’o Domingu resurisaun kapitál Dili hakmatek, tanba sarani hotu hanoin de’it Maromak oan Jesus Kristu Nia mate.
Padre Maubere hatete liuhosi nia omília Domingu resurisaun ne’e katak, durante nia sai Na’i Lulik, tinan 45 maibé nia haree iha semana Santa tinan ida-ne’e mak hakmatek loos.
“Tuir ha’u haree iha semana Santa tinan ne’e, hakmatek loos, hahú iha Sesta-feira Santa, Sábadu Santo sidade Dili ne’e hanesan ha’u haree hanesan mate, tanba hotu-hotu hanoin iha Maromak, ba viasakra, adorasaun krus no horikalan mai misa vijilia Páskua, ne’ebé ha’u haree hanesan sinál boot ida ne’ebé ita hakarak atu hanoin fali ho Maromak, imporntante ida-ne’e, entaun, mak ita hala’o ita-nia moris iha liturjia nia-laran, hodi simu Maromak iha ita fuan, atu ita sai naroman”, Padre Domingos Maunbere, hatete iha nia omília iha misa Domingu resurisaun iha parókia Sagradu Coração de Jesus, Bekora, (31/03).
Padre selebrante hatete ne’e hatudu katak husi komuniaun ho Jesus ne’ebé hakarak simu fila-fali no hakarak atu moris hamutuk ho Nia.
“Iha kuarezma ida-ne’e, ita-nia Amu Papa nia mensajem husu ita atu tama fila-fali ita susar no terus sira, no ita tanis sira no ita-nia alerik sira hodi fó hanoin ba Maromak no hanoin ita ne’ebé mak dehan ha’u haree ha’u-nia povu nia terus no ha’u rona halerik tanba ne’e haruka Moisés ba sadia povu ne’e”, katak nia.
Aleinde ne’e amu Maunbere haktuir katak, Amu Bispu no amu Kardiál nia mensajem mós husu ba sarani sira tenke hakbesik fali ba Maromak oinsá husi Domin, hadomi loloos, labele hadomi interese maibé hadomi ne’e katak fó an no hadomi ne’e katak mate ba ema seluk hanesan Jesus mate iha krus.
“Ha’u iha Domingu ramos iha katedrál amu Kardiál sei dehan ha’u nu’unka haree ema barak hanesan iha tinan kotuk, iha loron 2 de Abril iha Bekora, katak iha tinan kotuk ne’e hatudu duni oinsá ita-nia unidade ho Igreja, tinan ida-ne’e mós hanesan ita mai haklaken Jesus iha ita-nia moris”, nian afirma.
Nia hatutan, hakat liu iha festa páskua ne’ebé atu tama iha komuniaun tuir tema tinan ida-ne’e katak tama ho komuniaun ho Jesus, Kinta-feira Santa ne’e isin lolon husi eukaristia no husi ukun fuan domin, sai ida de’it ho Jesus no Sesta-feira Santa komuniaun iha Jesus husi Nia domin, mate tanba domin, no Sábadu Santo komuniaun ho Jesus iha ida-idak nia klamar.
Amu Pároku ne’e hatete, Padre iha Domingu ida ohin amu Bispu na’in-3, husi Baukau, Dili no mós Maliana fó mensajem atu refere katak Páskua hakat liu pasajem husi tempu terus ba solok no atán ba liberdade no mate ba moris hias no nakukun ba naroman ne’ebé hetan nia sentidu loloos iha Jesus Kristus nia terus, mate no moris hias nian.(*)
588 total views, 3 views today
Bele hare Video Seluk :
Subscribe to Timorpost
