“Atan diak, tan ó diak iha buat wituan, ha’u sei tau ó iha buat wain nia oin”.
(Reflexaun badak ba Domingo XXXIII tempo komun nian. Pro. 31, 10-13,19-20, 30-31; Sal. 127; 1Ts. 5, 1-6; Mt. 25, 14-30)
Hosi: Luis Pereira S,J
Kontexto!
Nai Maromak fo ba ita ida-idak ‘bensaun/talentos núdar prezente. Ita preciza uza bensaun/talento sira ne’e ho sabedoria/didiak, iha ita nia moris hodi lori ita ba meta/objetivo moris ne’e rasik: atu hahi, atu hanai no atu serbi Nai Maromak, ita nia Kriador. Leitura sira domingo XXXIII tempo kumun nian konvida ita atu halo serbisu Reino Maromak nian ho bensaun/talento sira ne’ebé ita simu ona ne’e. Bensaun/talento sira mak saidá? Ita nia kapacidades ligado ho intelektual, ligado ho kreatividade, ligado ho ita nia relasaun sira, ligado ho artes no ligado ho espiritual.
Ponto 3 ita bele reflete hamutuk:
1. Feto virtudiosa ida!
Leitura dahuluk husi livro Proverbio haktuir konaba knananuk hahi nian ba feto/ferik-oan ne’ebe uza nia talento sira hodi serbisu ba diak. Hatudu feto virtudiosa ida katak feto ho valores ne’ebe asegura ksolok, valor serbisu, valor kompromisso no valor laran luak, valor hamtauk Maromak. Valor sira ne’e mak ita preciza ‘HATAIS’ nudar discipulo ou ema ne’ebe lao tuir Jesus-Kristo atu bele moris iha ksolok iha propjeto Nai Maormak nian no koresponde ba misaun ne’ebé Maromak konfia ba ita núdar ema sarani. Basá, salmista dehan ema ne’ebé lao tuir Maromak mak ema sira abencoado/diberkati.
2. Oan Naroman nian!
Leitura daruak husi Saun Paulo nia surat ba sarani sira iha Tessalónica fo hanoin ita katak ita mak naroman no diak nia oan sira. Ita sira ne’ebé simu ona batismo, hatais ona Kristo nia valor sira: liu husi moris integrado, moris iha domin no lia-los, ita sai ona Maromak oan no ita Maromak oan duni. Tan ita Maromak oan duni, ita naroman nia oan. Jesus mak naroman no ita preciza lao tuir naroman ne’e, atu ita haroman ita dalan no ita-an ho ninia valor sira. So nuné deit mak hatudu ita pronto nafatin hodi hein Nai nia mai ba daruak ne’ebé ita la hatene loron no horas. Ita preciza pronto-atento no vigilante nafatin no dalan diak liu atu hatudu pronto-atento no vigilante mak sai naroman nia oan.
3. Atan diak sira!
Leitura datoluk husi Saun Mateus haktuir konaba aiknanoik talentos nian. Atan nain tolu ne’ebé simu ‘osan’ la hanesan husi sira nia ‘bos’. Atan ida simu osan 5, atan ida seluk simu osan 2 no ita ida ikus simu osan 1. Atan sira ne’ebé simu osan 5 no 2, halo esforso, buka dalan, serbisu makás atu multiplika sira nia osan. Tamba ne’e mak sira simu grasa sai atan diak. Ba sira, ‘bos’ konfia tan buat bót/wain. Jesus rasik dehan: “Diak, atan Diak! tan ó diak iha buat wituan, ha’u sei tau ó iha buat wain nia oin”. Jesus hahi atan diak sira ne’ebé uza sira nia rekursos ho sabedoria. No nia kondena atan ida ne’ebé la uza nia rekurso ho diak. Ba nia, Nia hasai tan rekurso ne’e, hodi fo ba ema seluk.
Ita ida-idak simu bensaun/talentos husi Nai Maromak núdar prezente furak. Nai Maromak konfia ba ita rekursos, skills no tempo. Ita preciza halo esforso, buka dalan no serbisu makás atu multiplika bensaun/talento sira ne’e. So ho multiplika deit mak ita neneik no bebeik lao ba ideal: sai ema liu tan/ser mais humano (imagem e semelhança de Deus).
Ita habadak reflexauun ne’e hodi dehan, ita iha responsabilidade atu uza bensaun sira ne’ebé Nai Maromak fo ba ita ho sabedoria no ho diak atu halo mudansa positiva ba ita-an, hodi serbi ita nia maun-alin sira no hodi glorifika Maromak. Mai ita ba hatais valor sira feto virtudiosa hanorin, valor sira atan diak sira hatudo, atu nune, ita bele sai oan naroman nian ou Naroman nia oan. So nuné deit mak ita bele hananu ho salmista: ”Rahun diak ba ida ne’ebe tuir Maromak nia dalan”. Amen! (lupersj)
627 total views, 6 views today
Bele hare Video Seluk :
Subscribe to Timorpost
