Dili (Timor Post) — Komisaun Konjunta ba seremónia Resessun iha Aeroportu Internasionál Prezidente Nicolau Lobato no Missa agradesimentu ba Kardeál dahuluk Timorense nian, ne’ebé sei realiza iha loron 5 to’o 6 fulan Setembru tinan ne’e, no sei konvida mós Bispu sira iha nasaun viziñu sira hanesan Darwin, Atambua, no Kupang.
Prezidente Komisaun Organizador, Padre Guilhermino da Silva, hatete sira hato’o ba Xefe Estadu, sekuensia ba seremónia loron rua nian, au mezmu tempu konvida Xefe Estadu, tanba ida ne’e ondra boot ida ba povu no Timor-Leste.
“Foin primeira-vés Vatikanu bele foti Timoroan ida ba Kardéál,” Padre Guilhermino, dehan foin lalais ne’e, hafoin remata enkontru ho Xefe Estadu iha Palásiu Prezidensiál, Bairru-Pité, Sesta (26/08).
Padre haktuir, Kardeál ne’e hanesan pozisaun ida, iha uma kreda Katólika nian, no nia servisu hamutuk ho Papa iha Vatikanu, parte ida ne’e la signifika Arsebispu Dom Virgílio sai ona Kardeál no husik Timor.
“Bispu nafatin, hanesan Kardeál no hela iha Timor, servisu iha Timor,” Padre Guilhermino afirma.
Alende ne’e mós ko’alia kona-ba atividade ne’ebé sei hala’o iha loron rua nia laran maka, resesaun iha dadeer, hotu sei ba Aeroportu Prezidente Nicolau Lobato, hodi simu Kardeál Timoroan ida ne’ebé foin fila husi Vatikanu, no iha loron ida fali maka hotu-hotu selebra missa agradesimentu iha Tasi-Tolu.
“Ba seremónia rua ne’e, ami komisaun konjunta ne’ebé forma husi Igreja no parte Governu halo ona servisu balun iha terrenu, tantu iha Tasi-Tolu, fatin seremónia no mós iha parte Administrasaun liga ho konvite sira”, nia hateten.
Iha planu Komisaun nian, sei konvida mós Bispu sira iha nasaun viziñu sira hanesan Darwin, Atambua, no Kupang, sei sira iha posibilidade bele mai partisipa iha missa agradesimentu ba Kardeál dahuluk Timorense nian.
Enkuantu kona-ba osan mai husi Konferénsia Piskopál Timorense nian no mós apoiu husi Governu ho montante Dólar Amérikanu rihun 220 USD, liu ne’ebé komisaun konjunta ne’e iha.
Padre Guilhermino, relata tan kona-ba preparasaun ba Kardeál Primeiru Timorense nian, husi ne’e, preparasaun hahú halo tiha ona iha loron 15 fulan Agostu no kuaze pursentu 70, komisaun halo tiha ona preparasaun sira, liuliu iha Tasi-Tolu ba fatin atu missa, prepara tenda, preparasaun mós Toilette Mobel no hadi’a kanalizasaun bee, inklui taka rai kuak iha fatin seremónia.
“Prezidente Repúblika, José Ramos Horta, disponivel no kontente loos, atu partisipa iha seremónia resesaun iha Aeroportu no mós missa agradesimentu Tasi-Tolu. Oráriu Kardiál to’o Timor 5:00 dader ho aviaun Aero Atlántiku no tuun iha Aeroportu tuku 6:00 ho balun,” nia hakotu.
2,889 total views, 3 views today
Bele hare Video Seluk :