DILI (Timor Post) – José da Silva, husi Munisípiu Bobonaru, halo nia atividade liuhusi hili lata mamuk sira iha lixu fatin, hafoin fan ba komapana besi tua hodi bele sustenta nia moris loron-loron nian.
Nia hatete, halo atividade liuhusi hili lata mamuk ne’e, la’ós foin halo, maibé dezde tinan barak ona hamoris an ho servisu ida ne’e.
“Ha’u dadeer tenke sai husi uma sedu, hodi mai iha lixu fatin atu hili lata mamuk sira, tanba kuandu karreta Saneamentu mak to’o uluk, entaun sira suru hotu hodi ba soe iha lixu fatin Tibar, tanba ne’e ha’u tenke ba sedu hili lata mamuk sira,” nia hateten ba Media Online Timor Post, iha lixu fatin Kulu-hun, Domingu (28/08).
Nia dehan, atividade hili latan mamuk sira mak hanesan serveja fatin, Delos fatin, Kokakola, Fanta no selu-seluk tan iha lixu fatin, para bele fan hodi sosa nia presiza sira.
“Ha’u iha oan sira servisu hotu, maibé ha’u nafatin halo ida ne’e, para fan hodi sosa saida mak ha’u hakarak, ha’u-nia oan iha para hola sasán sira tau iha uma laran hodi ami han, maibé ha’u mak hakarak halo atu iha osan hodi sustenta ha’u-nia moris saida mak ha’u hakarak,” nia dehan.
nia hatutan, “Ha’u hili lata mamuk ne’e, lori ba tau hamutuk iha uma barak tiha mak fan, tanba karon ida hetan kilo ida, entaun kilo ida nia hetan osan 3 USD, maibé nia depende ba lata mamuk hafoin bele tetu”.
Nia dehan, dala-ruma tetu ne’e depende lata mamuk, kuandu nia hili barak entaun bele hetan karon rua ou tolu, nune’e bainhira ita tetu tiha hetan osan 9 USD, Mais depende ba lata mamuk, lata mamuk karon hira, entaun tuir ida ne’e.
“Dala-ruma ha’u hili to’o iha fulan ida mak tetu dala ida, nune’e para barak”, nia informa.
Aleinde ne’e ikus liu nia dehan, la’ós hili de’it lata mamuk, maibé hili mós taxu aat, sana aat no besi aat sira tau hamutuk mak ba fan dala ida kompana besi tua sira para bele hetan osan barak hodi sustenta nesesidade loron-loron.
1,396 total views, 6 views today
Bele hare Video Seluk :