DILI (timorpost.com)—Bankada CNRT iha Parlamentu Nasionál (PN), lekar sai gastu ne’ebé Autoridade Rejiaun Administrativu Espesiál Oe-cusse Ambenu (RAEOA) hala’o iha tinan 2016 to’o 2018, maibé deputadu bankada Fretilín, Antoninho Bianco hatete, ida ne’e la’ós Fretilín mak ukun iha momentu ne’ebá.
“Sira halo projetu-30 no projetu-rua de’it mak liuhusi prosesu aprovizionamentu, entaun halo atu lee fila fali auditoria finanseiru Câmara da Contas 2016, 2017 no 2018. Hafoin lee didi’ak auditoria ne’e, bankada CNRT deskobre faktus-tolu, adenda kontratu dala barak projetu mak ajusta direta,” Deputadu Bankada CNRT, Saul Salvador, hateten liuhusi intervensaun iha reuniaun plenária Parlamentu Nasionál, Tersa (05/03/2024).
Nia deskobre katak, konstrusaun Ferry Haksolok ho empreza Atlantic Eagle Shipbuilding, iha nasaun Portugal ho valor kontratu inisiál ho valor orsamentu millaun 17,3 USD iha tinan 2014, sa’e ba millaun 24,5 USD.
No supervizaun ba prosesu administrativa RAEOA husi empreza Profisio, kontratu inisiál millaun 697.00 USD, no adenda kontratu, tanba projetu atrazu nune’e kustu sa’e supervizaun sa’e ba millaun 2,7 USD.
Supervizaun ba konstrusaun otél Pante Makasar husi empreza Tecnobroen ho valor rihun 840,5 USD no adenda kontratu sa’e ba millaun 1,141 USD. Dezeñu konstrusaun no manutensaun ponte Tono iha tinan 2014 halo kontratu ho empreza Ady Karya ho valór projetu millaun 17,218 USD no halo adenda kontratu dala-haat no ikus mai kontratu aumenta 3% liu.
“Primeiru, pratikamente REAOA komite adenda kontratu barak, relatóriu Câmara das Contas hatudu mosu mudansa signifikante iha aumenta kustu projetu barak mak la tuir prazu no kontratu orijinál,” nia esplika.
Nia haktuir, iha tinan 2015 Autoridade RAEOA halo kontratu ho empreza Wijaya Karya hodi halo konstrusaun ba Portu Oekusi ho valor projetu millaun 79,8 USD halo alterasaun kontratu ne’ebé sa’e to’o millaun 120 USD ka aumenta liu 50%.
Nune’e mós, RAEOA halo ISQ hodi halo supervizaun ba konstrusaun Aeroportu ho valór millaun 5,524 USD, no halo adenda dala-rua no orsamentu aumenta ba millaun 8,488 USD.
No iha tinan 2014, kontrata empreza Wijaya Karya ba projetu dezeñu konstrusaun no manutensaun estrada pakote-1 ho valór inisiál millaun 41,3 USD, no halo adenda dala-lima no valor orsamentu ba projetu refere aumenta ba millaun 45.00 USD.
Kontratu mós empreza Utama Karya ba projetu dezeñu kontrafasaun no manutensaun ba estrada pakote-2 ho kilómetru 27, 43, hetan adenda kontratu sa’e ba millaun 38,52 USD.
Tanba ne’e, bankada Governu husu ba Nonu-Governu konstitusionál hodi kumpre rekomendasaun husi Câmara dasa Contas, no husu mós ba Ministériu Públika no Komisaun Anti Korrupsaun (KAK) atu halo investigasaun ba Autoridade RAOEA nian.
Hatán ba preokupasaun ne’e, Deputadu Bankada FRETILIN, Antoninho Bianco, hatete, relatóriu Câmara das Contas hatudu daudauk ona, tan ne’e relatóriu sira akontese iha CNRT no PD nia ukun.
“Ha’u hanoin maluk balun hateten katak Câmara das Contas iha 2015, 2016, 2017, 2018 ne’e, hira ne’ebé ko’alia ne’e mak ukun, la’ós ami mak ukun. Ne’ebé ami mós hatene Câmara das Contas relatóriu barak rezultadu buat balun akontese daudauk,” nia hateten.
Tuir Bianco, órgaun soberanu ida-idak hakru’uk ba lei, ezekutivu sira ezekuta OJE karik tuir regra no Parlamentu Nasionál aprova lei karik labele kontra konstituisaun. Tribunál atu deside karik atu di’ak ka aat mós tenke simu.
Nune’e mós ba Prezidente Parlamentu Nasionál no Prezidente Repúblika atu promulga karik konfirma halo didi’ak mak foin bele promulga.
“Ukun atu rezolve problema, la’ós ukun la hatene rezolve problema duun ema seluk mak sala, ne’e ami hanesan foho-oan sira ne’e, ami-nia lisaun sira la hateten nune’e, kaer lisan eh lisan atu rezolve problema, la’ós duun fali ema seluk nia sala fali,” nia hateten.
2,901 total views, 6 views today
Bele hare Video Seluk :
Subscribe to Timorpost
