DILI, (timorpost.com)— Viajen Vise Primeiru Ministru, Ministru Koordenadór ba Asuntu Ekonomia, Ministru Turízmu Meiu Ambiente, Francisco Kalbuadi Lay, ba rai-liur daudauk ne’e buka hela emprezáriu estranjéiru sira hodi sósiu ho empreza lokál hodi dezenvolve fatin turístiku iha rai-laran.
Diretora Diresaun Nasionál Marketing (DNM), Inania Ross Ximenes Gonsalves, haktuir ministériu iha ona planu atu hadi’a fatin turízmu sira iha Timor-Leste, ne’ebé determinadu ona, hodi nune’e bele atrai turista sira mai halo vizita
“Polítika IX Governu nian daudauk ne’e, governu esforsu-an hela hodi hadi’a pontu turístiku sira, agora daudauk ne’e determina hotu ona, iha ne’e governu agora hatene hela, ami-nia Vise Primeiru Ministru, Ministru Turízmu Meiu Ambiente daudauk hala’o hela viajem ba liur sira ne’e hodi bele konvoka no buka emprezáriu sira iha estranjéiru hodi bele mai sósiu hamutuk ho Emprezáriu sira timoroan sira hodi harie ka hadi’a fatin ne’ebé determina hotu ona”, dehan Diretora DNM, Ivania Ross Ximenes Gonsalves, ba jornalista sira iha portu Dili, Kuarta, (06/03), hafoin simu turista sira ho ró kruzeiru vizita Timor-Leste.
Nia hatutan, “Ita-nia governu hakarak hadi’a fatin turízmu sira hanesan fasilidade no otél sira ne’e, tanba hatene katak daudauk ne’e ita atu tama ona iha ASEAN, entaun pedidu husi ASEAN nia ne’e, ida mak liuliu fasilidade atu halai liu ba otél, sira-nia pedidu ne’e tenke iha Timor iha, mais ou menus 10 otél ne’ebé mak 5 estrelas hodi atende ita-nia turista sira no mós ba bainaka sira ne’ebé mai tuir konferésia, tanba ita tama ona ASEAN no sei iha mós konferénsia internasionál ASEAN iha ne’e”.
Tanba ne’e esperansa ba futuru, ba oin Governu iha ona planu hirak ne’e maibé presiza kontribuisaun husi komunidade, liuliu labele soe foer arbiru hodi kontribui ba sidade ne’ebé moos para bele atrai turista.
Prezensa Diretora ne’e nian iha Portu Dili hodi simu vizitante sira ho ró kruzeiru rua ne’ebé hakarak vizita Timor-Leste hodi diverte no mós haree paisajen ne’ebé pás no pontu turístiku sira ne’ebé sira hakarak deskobre.
Husi vizita ne’e, turista sira bele hatutan no fahe esperiénsia durante iha Timor-Leste ba sira-nia maluk sira, ne’ebé bele atrai no interesante ba ema seluk atu vizita.
Vizitante sira vizita ne’e bele hatama taxa mai Timor-Leste, tanba taxa husi vistu ne’e mak nu’udar rendimentu ba iha kofre estadu.(*)
2,712 total views, 3 views today
Bele hare Video Seluk :
Subscribe to Timorpost
