Dili (timor-post.com)-Estudante hosi Universidade Nasionál Timor Lorosa’e (UNTL), hatais alma-mater no leba masa-mutin, hodi fa’an fore-mungu iha fatin-fatin, nu’udar esplorasaun kapasidade kriativu.
Grupu negósiu fore-mungu kompostu husi Rosália Maria Olímpia Herculano Valenti, Juliana Lay Martins, Cidália Fernandes Teles no Arcângela Martins, tenta esplora sira ninia kapasidade kriativu liuhosi negósiu fore-mungu.
Grupu negósiu hala’o estudu iha UNTL, liuhosi Fakuldade Ekonomia no Jestaun liuliu departamentu kontabilidade, agora daudaun semester tolu ona iha tinan akadémika ne’e.
Hala’o negósiu ne’e nu’udar matéria pratika kona-ba jestaun marketing nian, ne’ebé oferese hosi profesór, hodi hetan valor osan tuir tersetu 500 USD ho durasaun tempu fulan tolu.
“Profesór mak hakarak atu esplora ami nia kapasidade no kriativu to’o iha ne’ebé ona, tanba nia hakarak ami mós sente hanesan inan-aman sira nia sente, bainhira fó osan mai ami,” nia informa ba Timor Post iha jardín 5 Maiu Kolmera, Sesta (24/03).
Liuhosi matéria pratika ne’e mak estudante sira hahú fahe grupu, kada grupu ida ema na’in-haat to’o na’in-neen, atu hala’o negósiu rasik, husi grupu ne’e mak deside, hodi fa’an fore-mungu.
“Ha’u sente fa’an mak di’ak, nune’e ha’u bele sente esforsu no kolen to’o ona ne’ebé, bainhira ita esforsu rasik ba ita nia-an, hanoin to’o duni ita nia hakarak. Ida ne’e, hanesan priviléjiu boot mai ami”, nia sente kontente.
Osan atu halo negósiu estudante sira rasik mak kontribui kada ema ida dolar 5 ne’ebé ema na’in-haat sira nia osan kapitál hamutuk 20 USD.
Osan dolar ruanulu ne’e uza hodi sosa ekipamentu hanesan fore-mundu, susu-been, mutiara, plástiku kaap no kanuru.
“Ami nia grupu fa’an semana ida ona, lukru ne’ebé ami hetan agora daudauk hamutuk 70 USD. Ha’u fiar ami nia grupu sei hetan osan liu tersetu 500 USD”, nia promete.
Durante grupu ne’e fa’an la hasoru dezafiu ruma, maibé rai-manas mak makaas, ne’ebé ida ne’e la tau hanesan preokupasaun, grasa adeus maromak próteze tanba sira nia movimentu la’o ho di’ak.
Profesór haruka atu halo negósiu, nune’e labele tane liman beibeik ba inan-aman, maibé esforsu-an rasik. Tan ne’e, estudante na’in-haat deside fa’an fore-mungu tanba la kauza ba ema nia moris, maibé konsumu fore-mungu fó saúde di’ak ba ema nia saúde.
Sira na’in-haat haree husi klima, tanba Timor-Leste rai maran, tan ne’e mak grupu estudante hili atu fa’an fore-mungu, enkuantu konsumidór gosta han fore-mungu ho loron hanoin sira sente fresku.
Durante ami fa’an dezafiu ami hasoru mak rai-manas, maibé ida ne’e la tau hanesan preokupasaun, grasa adeus maromak próteze tanba sira nia movimentu la’o ho di’ak.
Estudante iha Fakuldade Ekonomia Jestaun liuliu departamentu kontabilidade, fahe hotu grupu ne’ebé grupu balun fa’an es-buah, fa’an etu, hudi sona, burger, pizza no balun mak fa’an fore-mungu.
Montante osan 500 USD sei la hatama ba departamentu kontabilidade, maibé osan ne’e atu fahe fali mós di’ak ou bele kontinua halo negósiu ba oin.
Tanba ne’e, estudante na’in-haat seidauk fiar loloos atu fa’an nafatin ba oin, maibé entre sira na’in-haat kuandu rona malu no fiar malu nafatin hanesan agora, hanoin kria negósiu ki’ik, atu bele sustenta nesesidade loron-loron.
1,912 total views, 6 views today
Bele hare Video Seluk :
Subscribe to Timorpost
