DILI (timorpost.com)-Kada tinan estudante sira hosi Rejiaun Administrativa Espesial Oe-cusse Ambeno (RAEOA) atu asesu ba iha Universidade Nasional Timor Lorosa’e (UNTL) minimu tebes.
Reprezentante Estudante Oekusi-Oan, Donatos Colo, hatete, tinan-tinan Oekusi-oan atu asesu ba iha UNTL sempre mai ho numeru uitoan de’it kompara ho munisipiu sira seluk.
“Ha’u lamenta tebes kona-ba asesu ba iha UNTL ne’e, dala ruma ita haree iha fakuldade balun Oekusi-oan laiha no einjeral numeru uitoan de’it”, Donatos Colo haktuir ba Timor Post iha Timor Plaza, Sabadu (25/02).
Lisensiatura hosi UNPAZ ne’e hatutan, oportunidade ba estudante sira atu asesu ba universidade publiku ne’e tenke balansu, tanba durante ne’e Oekusi ninia numeru mak ki’ik liu.
Tuir nia haree katak, Oekusi-oan sira ne’ebe mak durante ne’e tama ba iha UNTL ne’e maioria ba departamentu sira ne’ebe ema ladun fo prioridade, maibe hanesan Medisina Jeral ne’e Oekusi-oan nia ema laiha.
Nia dehan, iha tinan akademiku 2023 nian ne’e estudante na’in rihun haat resin Mak sei asesu ba UNTL, maibe Oekusi-oan la to’o 100, ne’e hatudu katak partisipasaun Oekusi-oan minimu tebes atu asesu ba universidade estadu nian.
Enkuantu, Ministériu Edukasaun Ensinu Superior Siensia no Kultura (MESSK) publika ona lista ofisial ba kandidatu Sira ne’ebe admitidu atu asesu ba ensinu superior publiku, iha Universidade Nasional Timor Lorosa’e (UNTL) no Institutu Politekniku Betano (IPB) ba tinan akademiku 2023 nian iha loron Sesta, 24 fulan Fevereiru 2023.
Total numeru kandidatu Sira ne’ebe admitidu atu asesu ba UNTL no IPB hamutuk na’in 4804. Hosi numeru ne’e na’in 4421 ba UNTL no 381 ba IPB.
(Oro)
2,717 total views, 38 views today
