LIKISÁ (timorpost.com) — Ensinu Pre-Eskolár (P.E) Varela Haburas, ne’ebé mak lokaliza iha aldeia Mota Ikun, suku Mota Ulun, postu administrative Bazartete, munisípiu Likisá, gradua estudante finalista tinan 2023 hamutuk na’in-25.
Koordenadór P.E Varela Haburas, Joana da Cruz, hatete eskola ensinu Pre-Eskolár Varela Haburas ne’ebé mak harii hosi Veterana Madalena Bidau ‘Kasian’ iha loron 28 fulan Outubru tinan 2008, ne’ebé dezde eskola refere harii to’o 2023 ne’e gradua estudante hamutuk na’in-75.
“Dezde eskola ne’e harii to’o mai ohin loron ami halo graduasaun ba estudante finalista hamutuk na’in-75 kompostu hosi estudante mane no feto, ba tinan 2023 ninian, ita gradua finalista na’in-25”, Joana da Cruz, hatete ba Jornalista Timor Post hafoin remata serimónia graduasaun iha ensinu Pre-Eskolár Varela Haburas, Caiteho, Segunda (20/11).
Profesora ne’e hatete, eskola harii hosi veterana Kasian ho nia osan rasik no hetan mós apoiu orsamentu balu hosi parseiru sira iha Australia ne’ebá no eskola refere konstroi hosi FALINTIL Forsa Defeza Timor-Leste (F-FDTL).
“Fasilidade ba estudante sira atu aprende ne’e, ami sente sufisiente, tanba eskola ne’e privadu ne’ebé osan ne’e hosi fundasaun mak tau osan hodi sosa fasilidade sira ne’e”, alumni hosi Eskola 28 Novembru ne’e haktuir.
Joana subliña, Ministériu Edukasaun (ME) apoiu kona-ba merenda eskolár, osan Konseisaun eskolár no profesora na’in-rua ne’ebé mak hanorin iha eskola refere hetan kontratu hosi ME.
Aleinde ne’e, Fundadora Ensinu Pre-Eskola Varela Haburas, Madalena Bidau Soares ‘Kasian’ hatete, tanba sá eskola refere mosu iha suku mota ulun, aldeia mota ikun, bainhira eskola ne’e hamriik iha ne’e ho mehi ida ke aas liu kona-ba funu katak, suku ida mota ulun, aldeia mota ikun ne’e eziste hanoin ba funu no la-hanoin tun sa’e, la-hanoin ema sosa sira hodi osan ne’e tau bolsu lae, maibé hakarak funu atu manan ukun rasik-an to’o ohin loron bele hamosu buat barak iha fatin refere.
“Tanba ne’e uluk ha’u hanoin atu loke eskola, ha’u ko’alia loos eskola ne’ebé ha’u loke, ha’u nia mehi mak ne’e maun Alfredo Varela, bainhira nia kaer Partidu Fretilín no tau sede permanente iha suku Mota Ulun, aldeia Mota Ikun ne’e hakuak no halibur ema hotu iha fatin ida ne’e hodi haree ba ukun rasik-an tanba rezisténsia aas liu”, Funu na’in ne’e haktuir.
Inimigu sira ba liu de’it estrada boot ka estrada internasionál ba Indonézia mós fatin refere, maibé komportamentu ba sira nia luta sira nia isin lolon lohi malu atu inimigu labele haree sira, tanba sira nia hanoin ne’e hamutuk hela iha ai laran.
“Tanba ne’e ita ukun-an buat barak ha’u la halo ba aldeia Mota Ikun, maibé suku Mota Ulun tomak ha’u ko’alia ho sira kona-ba oferese eskola ne’e atu ita nia oan sira eskola iha aldeia Klasemauluta, suku Mota Ulun no eskola nia sanak ne’e tenke tau iha aldeia Mota Ikun, tanba Mota Ikun, tanba kiik ona sira lahatene halo polítika mós mate, ho nune’e mak ha’u harii eskola ne’e”, nia tenik.
Fundadora ne’e hatene, kiik oan sira agora ne’e la terus, maibé sira nia maluk uluk mate ba funu hodi hetan ukun rasik-an, tanba ne’e mak eskola Varela Haburas hamriik, atu nune’e sira bele rekoñese sira nia maluk ki’ik oan hanesan ne’e mós mate.
“Tanba ne’e ha’u harii eskola ne’e ho ha’u nia osan rasik, osan ne’ebé ha’u hetan ha’u labele han hemu de’it, maibé ha’u tenke halo netik buat ruma ba nasaun ida ne’e, liuhosi harii eskola iha rua iha suku Mota Ulun, postu administrative Bazartete, munisípiu Likisá”, nia haktuir.
Aleinde ne’e, Diretór EBC Bogro, Bernardo dos Santos, hatete graduasaun refere akontese tinan-tinan no tinan ida ne’e akontese iha Pre-Eskolár Varela Haburas, bainhira akontese graduasaun ne’e bele temi edukasaun bele la’o ba oin.
“Bainhira iha graduasaun ita temi katak ne’e edukasaun komesa la’o ba oin, hanesan ohin xefe Suku hatete, edukasaun ne’e ita labele husik iha dalan, bolu atensaun ba inan ho aman sira ba komunidade tomak edukasaun ne’e ita fahe ba rua, edukasaun noun formal no edukasaun formal”, nia tenik.
Edukasaun ida noun formal ne’e, edukasaun ida hosi inan aman no sosiedade tomak no edukasaun formal liuliu ba sira ne’ebé mak pre-eskolár, tinan tolu hakarak ka lakohi inan aman sira tenke lori ba rejistu, atu nune’e labarik sira bele aprende ona iha edukasaun formal ne’e, nia hosi edukasaun noun formal ne’e hosi labarik moris to’o boot iha inan aman no sosiedade.
“Ba na’in xefe suku no xefe aldeia ita sira ne’e hamutuk kontrola labarik sira ne’ebé tinan besik tama ba tinan tolu ita haruka sira ba rejistu ona iha pre-eskolár, tanba ha’u ko’alia beibeik ona katak, labarik ida tama ba ensinu báziku nia tenke ba ho sertifikadu pre-eskolar nian, sertifikadu ne’e mak sira na’in-25 gradua ona ne’e sira iha kaderneta, bainhira eskola tama sira lori hodi kaderneta ne’ebá rejistu”, nia hakotu.
Ikus liu hosi Reprezentante Inan Aman, Germano Augusto, haktuir nu’udar inan aman nia esperansa no orgullu ba inan aman sira no bainaka sira ne’ebé mak partisipa iha serimónia graduasaun ba estudante na’in-25 iha Pre-eskolár Varela Haburas.
“Sira na’in-25 nia graduasaun ita hotu mak sai sasin, nu’udar inan aman ami nia orgullu no esperansa katak, inan aman mesak ami labale dudu ami nia oan sira ba oin, maibé ami sei garantia ba edukadór sira, edukadór sira”, nia hakotu.
1,718 total views, 21 views today
Bele hare Video Seluk :
Subscribe to Timorpost
