Dili(timorpost.com)—Selebra loron Nasionál Ministériu Ensinu Superior Siénsia no Kultura (MESSK) ba da-17, MESSK no Federal Insurance (FI) realiza sertame ba Universitáriu sira iha Dili laran.
Manager Marketing and Claim, Herman Pane, hatete objetivu realiza kompetisaun sertame ida ne’e hodi komemora loron aniversáriu MESSK ba da-17.
“Kompetisaun ida ne’e ami bolu naran kompetisaun sertame, atividade ne’e ami realiza hodi komemora loron nasionál Ensinu Superior nian, ne’ebé mak monu iha loron 17 fulan Novembru kada tinan”, dehan Heraman Bane, ba Jornalista Timor Post iha Auditóriu Fundasaun Oriente, Kuarta (19/04).
Nia dehan, tinan ida ne’e Federal Insurance servisu hamutuk ho Ministériu Ensinu Superior Siénsia no Kultura atu realiza atividade sertame ba universidade sira hotu ne’ebé estuda iha área tolu mak, Enfermajen, Enjeñaria, Petróleu no Kontabilidade.
Nia relata katak, Universidade ne’ebé rejistu hamutuk grupu na’in-sia hodi kompete iha sertame, iha área Enjeñaria Petróleu nian iha Universidade haat mak hanesan DIT, UNDIL, UNITAL no UNTL, iha Akontabilidade nian iha hitu mak hanesan, IOB, DIT, UNPAZ, UNDIL, UNITAL, JSI no UNTL no iha área Enfermajen lima mak hanesan, ISC, ICS, UNTL, UNITAL no mós UNDIL.
Nia akresenta, loke kompetisaun ne’e la’ós de’it tanba primeiru, maibé liuhosi atividade ne’e bele hatene estudante sira nia koñesimentu teóriku no abilidade ne’ebé sira aprende ona.
“Maibé ami hanoin katak, ho atividade sira ne’e ita bele hatene estudante sira durante ne’e aprende teoria iha eskola, ohin ita bele haree oinsá mak sira nia koñesimentu, abilidade mak bele resposta pergunta ne’ebé prepara ona”, nia subliña.
Tuir nia, kompetisaun sertame ne’e importante tebes estudante sira, tanba sertame ne’e ba estudante finalista sira, durante ne’e aprende teoria lakleur tan sira bele implementa matéria kategoria sira ne’e iha kampu.
“Kapas tebe-tebes liu-liu ba sira ne’e halai ba area pratika entaun ita dehan katak sira durante aprende matéria teoria sira hatene mós oinsá atu aplika, tanba estudante sira ne’e maioria finalista ka semester ikus entaun lakleur tan sira ne’e mak ba iha kampu atu implementa matéria ka teoria ne’ebé aprende tiha ona iha banku universitáriu”, nia hatete.
Iha biban ne’e nia informa, Kompetisaun sertame ne’e sei kordena ho MESSK hodi realiza anualmente ba estudante sira.
“Ami hanoin katak ba oin ami sei kontinua nafatin bazeia esperiénsia ne’ebé ita realiza, tanba hanesan primeira vez ami realiza no ita haree perspetiva oin sei koordena hamutuk ho ministériu ensinu superior sé posibilidade ami hanoin sei realiza anualmente atividade ida ne’e”, nia dehan.
Iha fatin hanesan, estudante hosi João Saldanha Institutu (JSI) ne’ebé sai primeiru lugar iha área Akontabilidade, Aveeli Apariçio de Oliveira, Orgullu no agradese tebes ba Kompañia Federal Insurance, tanba loke Kompetisaun ne’e, liuhosi biban ne’e bele motiva sira atu estuda maka’as liu tan.
“Ha’u kontente no agradese ba Federal Insurance tanba bele loke kompetisaun ida ne’e, tanba liuhusi kompetisaun ne’e bele motiva ami atu estuda fila-fali buka fila-fali matéria ne’ebé ami liu tiha ona”, Reprezentante kompetitores ne’e hato’o.
Nia mós akresenta katak, atu manan iha kompetisaun sira ne’e tenke esforsu estuda nafatin no tau importánsia maka’as iha siénsia.
Entretantu, prémiu ba primeiru lugar kada ema ida simu osan 1000 USD iha grupu ida kompostu ema na’in-rua, segundu lugar hetan osan 500 USD kompostu ema na’in-rua no mós terseiru lugar hetan osan 100 USD kompostu ema na’in-rua.
2,538 total views, 3 views today
Bele hare Video Seluk :
Subscribe to Timorpost
