Dili (Timor Post)- Delegasaun Association of Southeast Asian Nations (ASEAN), Pillár Ekonomia, Kuarta (20/07), hala’o vizita ofisiál ba iha Portu Tibar hodi haree ninia progresu dezenvolvimentu.
Jestór Projetu Portu Tibar, Rui Soares, hatete sira halo aprezenta no esplika de’it ninia progresu ba Ekipa Komunidade Ekonomia ASEAN, tanba ne’e sira husu atu ba haree no vizita diretamente iha tibár, tanba sira haree aprezenta di’ak tebes hodi nune’e kompara ho aprezentasaun ne’e.
“Ohin ami aprezenta kona ba portu Tibar esplika de’it ninia progresu, depois informasaun jeral kona-ba portu Tibar tanba saida mak portu ne’e hari’i ho modalidade saida to’o agora nia prosesu oinsá, tanba ne’e sira iha oportunidade atu bele ba haree no vizita diretamente”, nia hateten iha Ministériu Finansa, Ai-tarak laran.
Nia dehan, obra konstrusaun Portu Tibar sei remata iha fim do ano parese iha fim Novembru tinan ida ne’e, hahú operasaun imediata no kooperasaun sei la’o durasaun 27 anos ne’e mak aranjamentu ne’ebé iha entre G0vernu Timor-Leste ho setor privadu, maibé momentu sira entuziazmu atu ba haree iha fatin portu ne’e rasik hodi halo observasaun ba konstrusaun ekipamentu sira ne’ebé iha ne’ebá.
Kontribuisaun husi parte Governu nian 130 USD, husi parte setór privadu valores sira 150, entaun ida ne’e parseiru públiku, privada kontribuisaun finanseiru mai husi parte rua nian ho total 280 USD ba Portu Tibar.
Nia dehan, iha aprezenta ne’e sira kontente rona ida ne’e fasilidade ke modernu entaun nune’e para sai hanesan fatin rejionál haat (4) bele dehan fatin tránzitu ba merkadorias sira ba distribuisaun nasaun seluk besik Timor.
“Tanba ami aprezenta hotu sira husu ami atu ba haree diretamente portu tibár tanba ami-nia aprezenta di’ak tebes”, nia dehan.
Alende ne’e Vise Ministru Turizmu Komérsiu Indústria (MTCI), Domingos Lopes Antones, afirma ohin ekipa projetu portu Tibar halo aprezentasaun di’ak kona-ba Projetu portu tibár, ekipa Komunidade Ekonomia ASEAN sira husu atu ba haree diretamente, tanba sira lakohi haree de’it iha aprezentasaun.
“Tanba ne’e ami sei lori sira ba infraestrutura liuhusi portu Tibar, sira sei haree rasik hodi kompara ho aprezenta ne’e, tanba ohin sira haree aprezenta ne’e didi’ak tebes”, nia hakotu.
Entretantu tuir observasaun Timor post nota iha terenu katak Ekipa Komunidade Ekonomia ASEAN ba haree no vizita diretamente Portu Tibar iha loron 20 Fulan Jullu tinan ida ne’e iha tuku 1:40 otl.
1,307 total views, 6 views today
