Oekusi(timorpost.com)—Aeroportu Internasionál “Rota do Sândalo” Oecusse presiza kria Autoridade Aeroportu, tanba durante ne’e iha difikuldade barak iha ne’ebá.
Prezidente Autoridade RAEOA, Rogério Tiago Lobato, hatete, Autoridade RAEOA ho Koordenadór Komisaun ZEESM-TL hala’o enkontru ho funsionáriu iha Aeroportu Internasionál Rota do Sândalo hodi hadi’a ninia jestaun.
“Ha’u mai iha ne’e atu enkontru hodi oinsá organiza Aeroportu ho didi’ak, ita nia funsionáriu kontratadu iha ne’e hetan problema barak, entaun ha’u rona sira hotu”, Rogério Tiago Lobato, informa ba jornalista sira iha Aeroportu Rota do Sândalo, Oecusse, Segunda (12/02).
Nia hatutan, agora solusaun ida hetan maka iha tempu badak kria Autoridade Aeroportu atu halo atividade sira ne’e ho base legal.
Ida tan maka, funsionáriu iha Aeroportu sei kria grupu Koordenadór ho estrutura depois mak hetan apoiu barak hosi asesores sira. Nune’e mós, asesores sira labele kria fali grupu keta-ketak.
“Hanesan asesores tenke servisu hamutuk hodi apoiu estrutura ne’ebé atoni oan sira presiza, tanba sira iha pilotu hodi Aeroportu funsiona ho di’ak”, nia dehan.
“Ha’u sente katak sira presiza liután komprensaun hosi asesores sira ne’ebé mai servisu iha ne’e, ida ne’e mak ha’u husu barak atu asesores na’in-rua iha Aeroportu tenke hamutuk”, nia haktuir.
Depois tenke fó mós oportunidade ba sira ne’ebé servisu kleur iha ne’e atu bele asesu ba formasaun iha rai li’ur hasae sira nia kapasidade.
2,382 total views, 6 views today
Bele hare Video Seluk :
Subscribe to Timorpost
