OEKUSI-Autoridade Rejiaun Administrativa Espesiál Oé-Cusse Ambeno (RAEOA), sei konstroi uma hamutuk 119 ba komunidade suku Lifau, Taiboko Sub-rejiaun Pante Makasar no suku Suni-Ufe Sub-rejiaun Nítibe, ne’ebé mak afeta ba iha konstrusaun estrada hahú husi ponte Noefefan to’o Oé-Nunu.
“Husi Lifau Aos-ero, Kabuk-pele, Makelab atu tama ba Oé-nunu, tinan ida ne’e ita sei halo uma hamutuk 119 ne’e hampir kota baru, ida mosu iha suku tolu ne’e,” Prezidente Autoridade RAEOA, Arsénio Paixão Bano, haktuir iha ámbitu distribuisaun ai-han Sesta Bázika iha aldeia Makelab, ne’ebé mak Timor Post asesu liuhosi Rádiu Komunidade Atoni Lifau, Kinta (16/03).
Prezidente Autoridade RAEOA ne’e hatutan, tinan ida ne’e autoridade RAEOA, la’ós konstroi de’it um aba komunidade afetadu sira, maibé sei harii tan eskola sekundáriu ida iha aldeia Makelab.
“Ita la’ós halo uma de’it ba komunidade afetadu sira, maibé tinan ida ne’e ita sei konstroi tan Eskola Sekundáriu Jerál foun ida iha aldeia Makelab, atu ajuda ita oan sira asesu ba edukasaun labele la’o dook,” nia promote.
Total dadus provizóriu komunidade afetadu ba konstrusaun Estrada Nasionál Pante Makasar, hahú husi ponte Noefefan to’o suku Suni-Ufe Sub-rejiaun Nítibe hamutuk 339.
Enkuantu, projetu reabilitasaun estrada nasionál Pante Makasar ba to’o Sub-Rejiaun Nítibe ezekuta husi kompañia Internasionál PT. Waskita Kaya ho valor kontratu millaun $23 ne’ebé Autoridade RAEOA, prevee husi Orsamentu Jerál Estadu (OJE) tinan 2022 ho durasaun servisu fulan 18.
885 total views, 36 views today
