Manufahi( timorpost.com)— Nonu Governu Konstitusionál liuhosi Ministériu Petróleu no Rekursu Minerais (MPRM) kontínua halo sosializasaun kona-bá Dezenvolvimentu projetu iha Kosta Súl.
Ministru Petróleu no Rekursu Minarai ( MPRM), Francisco da Costa Monteiro, hatete ekipa MPRM iha Munisípiu Manufahi ho objetivu prinsipál katak, atu sosializasaun programa Nono Governu Konstitusionál ba Dezenvolvimentu iha Kosta Súl nian.
“Ami mai atu informa programa sira ne’ebé mak Ministériu Petróleu no Rekursu Minarai nian iha tasi mane, hosi kedas Suai ba to’o Lorosa’e ne’ebá, maibé liuliu kona-ba Munisípiu Manufahi, prinsipalmente ba Betanu, ho ida ne’e ami mai iha atu informa saida governu hanoin hela atu halo iha Tasi mane nian”, Ministru Francisco Monteiro, hateten iha ámbitu sosializasaun ne’ebé hala’o iha Salaun IPB, Betanu, Segunda (12/02).
Tuir nia katak, Governu liuhosi Ministériu Petróleu no Rekursu Minarai iha hanoin ida ba iha Munisípiu Manufahi liuliu ba Betanu iha projetu Tasi Mane, objetivu prinsipál mak industrializasaun setór Petróleu, atu akompaña halo esportasaun, tanba depois sira hetan Mina ka hetan gas karik, sira produs tiha depois fa’an diretamente ba merkadu, ida ne’e ladún hetan aproveitamentu no ladún involve iha nia kadeia de valores hosi dezenvolvimentu setór ne’e rasik.
“Natarbora mak ita sei halo Abrantes ka Refinaria no Quimika, ne’e katak tinan haat ka lima mai governu prometidu katak hahú daudauk ona projetu tasi mane, maibé ita hein katak planu barak bele akontese hotu antes iha rohan governasaun ida ne’e, karik seidauk hotu governasaun tuir mai bele hatutan tan hodi infindu di’ak objetivu prinsipál industrializasaun iha setór Petróleu ne’e bele la’o duni iha ita nasaun”, nia haktuir.
Iha fatin hanesan, Prezidente Autoridade Munisípiu Manufahi, Luis da Costa Marçal, hatete povu Manufahi prontu simu kualkér desizaun ba saida de’it mak governu sentrál hatuur mai iha Munisípiu Manufahi liuliu iha suku Betanu.
” Ami la iha kbiit ida atu dehan hakarak ka la kohi, tanba kbiit tomak iha Nasionál, karik iha Mudansa ruma ka planu ruma anterior no atu fó desizaun foun ruma ba ami mós prontu, ami maka atu mai mós ami prontu atu simu, tanba dezenvolvimentu ne’e ba iha bei’ala sira nian mehi ba kualkér dezenvolve iha ita rai”, nia akresenta.
Entretantu, Partisipa hosi iha serimónia sosializasaun ne’e, Presidente CNCLN, Diretór Jerál MPRM, Prezidente Timor GAP. EP, Presidente Autoridade Munisípiu Manufahi, Komandante PNTL Munisípiu Manufahi no Prezidente IPB no inklui partisipa hosi Autoridade Munisípiu Manufahi.
Nune’e mós iha serimónia sosializasaun ne’e hetan Seguransa másimu PNTL Munisípiu Manufahi.
945 total views, 3 views today
Bele hare Video Seluk :
Subscribe to Timorpost
