MANUFAHI-Ekipa governu, kompostu Ministeriu Obras Públika (MOP) ho Ministeriu Estatal tenke ba urjente liga ba udan boot durante loron tolu halo mota Laklo invade kain atus ida resin iha aldeia Kolokau, suku Uma Bereloik, postu administrativu Alas, munisípiu Manufahi sofre inundasaun.
Situsaun ne’e vítima sira iha fatin akontesementu ezije urjente ba parte governu atu halo barrajen hodi satan netik mota refere.
Ho ezijénsia hirak ne’e, Tersa (10/05) ekipa Ministériu Administrasaun Estatál (MAE) no Ministériu Obras Públiku (MOP) tun diretamente ba fatin akontesementu suku Uma Bereloik.
Diretór Geral Dezenvolvimentu Rural, Ministério Administrasaun Estatal (MAE), Rozito Guterres hateten, ekipa konjunta rua kompostu husi MAE no MOP tun mai fatin akontesementu hodi hare diretamente situasaun ne’e.
Nia dehan, ekipa téknika halo ona levantamentu no identifika pontu 4 ne’ebé presiza halo prevensaun iha semana ne’e nia laran.
“Iha semana ida ka rua bele halo ona aprovasaun dezeñu no haruka ba Ministériu Finansas uza fundu kontinjénsia ba implementa projetu emerjénsia ba konstrusaun barazen mota” nia esplika.
Ba daudaun ne’e daudaun ita koordena ona ho Institutu Jestaun Ekipamentu (IGE) atu hahú halo ona normalizasaun ba mota Laklo nune’e komunidade bele fila hikas ba ida-idak nia uma hela fatin.
Tempu hanesan xefe brigada IGE rejiaun Rosa Muki Ainaru, Manatutu no Manufahi, Januário Gusmão hatutan, daudaun ne’e mákina pezadu eskavadora ida to’o ona iha mota Laklo.
“Ohin ami ho mákina ida mai ona no aban hahú halo normalizasaun bain tolu mákina ida sei mai tan hodi normaliza mota ho metru atus 700 atu nune’e korrente mota bele halai tuir ninia fatin” nia relata.
Nune’e administradór postu Alas, Franco da Costa Duarte hakle’an, nia akompaña ona ekipa governu sentrál hodi halo levantamentu ba identifika fatin sira ne’ebé risku.
“Iha levantamentu ne’e klaru ona katak ita hein kleur liu semana ida governu atu halo intervensaun konstrui brazens” sita Administrador Postu Alas ne’e.
