RAEOA-Prezidente Autoridade RAEOA Empozadu, Rogério Tiago Lobato, hatete nia mai la’os buka oportunidade, maibé atu servi povu Atoni-oan, hodi bele dezenvolve ba oin.
“Ha’u mai iha ne’e, atu servi Timoroan tomak, liuliu Oekusi-oan, la’ós mai atu buka fatin, mai atu servi rai ne’e, atu foti ba oin,” Rogério hato’o promesa liuhosi ninia diskursu hafoin simu pose iha Otel Bintang Lima, Oe-upu, Kuarta (31/01/2024).
Tanba Primeiru Ministru, Kay Rala Xanana Gusmão, sempre dehan independénsia ba ema balun de’it, tanba sae karreta no simu saláriu kada fulan, maibé ba povu sira iha foho leten susar atu sura.
Tanba ne’e, nia hatete, estrutura Prezidente Autoridade RAEOA foun, sei hala’o vizita atu haree povu Ida-idak.
“Ha’u mai iha ne’e, atu servi Oekusi-Oan, la’ós atu haree ba kor partidu polítiku,” nia hateten.
Nia dehan, tuir loloos Prezidente Autoridade RAEOA Sesante, Arsénio Paixão Bano, marka prezensa, maibé la mosu, iha serimónia tomada de pose ne’e.
“Ami na’in-rua Fretilin, maibé nia tara manu futu mak sala,” nia konta.
Prezidente Autoridade RAEOA Empozadu kompromete sei rejista komunidade afetadu, ne’ebé Estadu hadau sira nia rai, la hatene selu ho saída. Hothotu hakarak di’ak ba malu. Maibé komu sira mak envolve estrutura halo arbiru de’it no lahatene selu kompensasaun ho saída.
Rogério hatete, durante mandatu sei tau atensaun ba iha programa prioridade hitu (7) mak hanesan, Fornesimentu bee moos, ba populasaun RAEOA, hamenus presu eletrisidade hosi 0,23 centavus ba 0,10 centavus hodi fasilita investimentu ne’ebé kria industrializasaun ba rejiaun.
Fó direitu titulu ba rai hodi fasilita asesu ba povu hodi hetan kréditu hosi banku, konstrusaun ne’ebé lais ba estrada, regularizasaun ne’ebé justu ba kompensasaun ba rai no propriedade privadu ne’ebé ho abuzu podér hosi autoridade sesante ba rai no propriedade privadu, reforsa kontinua fó apoiu ba seitór edukasaun, saúde públika, pekuária no peskas no dezenvolve infra-estrutura Oé-Cusse too postu no suku sira.
Nia mós promete sei hala’o servisu no kontinua permanente koordena ho Primeiru-Ministru, atu lori duni dezenvolvimentu ne’ebé lalais no aseleradu iha territóriu RAEOA.
Iha programa ZEESM-TL, presiza elabora no implementa ho di’ak, sei bele sustenta aan rasik ho fundus proprio ida, la presiza ona hasai osan hosi kofre estadu, no transforma fonte ne’ebé importante tebes no inkluzivu, no mós fó kontribuisaun ba Orsamentu Jerál Estadu.
Prezidente Autoridade RAEOA mós promote katak, nia sei fó apoiu tomak bá João Mendes Gonçalves ne’ebé nomeadu hosi Konsellu Ministru hanesan koordenadór bá Komisaun Ezekutiva ZEESM.
Fiar Xanana Bele Rezolve
Entretantu ligadu ho polémika kona-ba rai le’un Naktuka iha Oekusi, akadémiku hosi Universidade Dili (UNDIL), Hugo Lourenco da Costa, hatete, ho lideransa Primeiru Ministru Kay Rala Xanana Gusmão, sei rezolve problema rai Naktuka.
“Los, maun boot Xanana halo buat barak ona to’o ita ukun-an. Ohin nia nafatin hamriik iha liña frente ba negosiasaun, ita reza ba maun boot atu Maromak tulun nia saúde di’ak atu ko’alia Timor-Leste ba mundu,” Hugo hato’o kestaun ne’e ba Timor Post iha knar fatin kampus UNDIL Maskarinas, Kuarta (31/01).
Dosente UNDIL ne’e afirma liutan katak, rai Naktuka dalan atu rezolve ho Indonézia mak tenke ho diplomasia, no labele rezolve ho funu ne’ebé hanesan akontese iha nasaun sira seluk.
Entretantu, akademiku UNDIL ne’e mós husu ba Prezidente Autoridade foun RAEOA, Rogério Tiago Lobato ho estrutura tomak presiza ko’alia ho ekipa negosiasaun para bele buka solusaun ba rai refere.
“ita espera sira servisu di’ak liutan hodi dezenvolve RAEOA iha futuru,” nia hateten ho liafuan ne’ebé nakonu ho esperansa.
Nia dehan, lideransa foun presiza hadi’a ekonomia povu nian no kria investimentu ba RAEOA no nia fiar katak estrutura foun iha vizaun di’ak tuir planu estratéjiku dezenvolvimentu nasionál 2011-2030.
594 total views, 3 views today
Bele hare Video Seluk :
Subscribe to Timorpost
