DILI (timorpost.com) — Rejiaun Administrativu Espesiál Oekusi Ambenu (RAEOA), menus funsionáriu Guarda Floresta, nune’e presiza halo rekrutamentu, hodi bele kontrola rekursu naturais iha Suku 18.
Xefe Departamentu Guarda Floresta Konservasaun Oekusi, Marcos Sufa Colo, hatete, daudaun ne’e menus rekursu umanu, ne’ebé susar loos atu kontrola rekursu naturais iha Oekusi.
“Ami funsionáriu Guarda Floresta permanente na’in-ualu susar atu bele kontrola rekursu naturais iha Suku 18, tanba luan no iha Oekusi besik Atambua no Kupan, entaun presiza funsionáriu barak, hodi kontrola iha area protejidu atu komunidade labele estraga floresta,” Marcos informa ba Timor Post, hafoin partisipa Formasaun iha Ministériu Negósiu Estranjeiru no Kooperasaun Pante-Kelapa, Kuarta (28/02).
Iha mós problema seluk maka laiha transporte liuliu motorizada no karreta, hodi apoiu pesoál Guarda Floresta atu uza hodi kontrola másimu iha area protejidu sira iha Oekusi, membru Guarda Floresta sira uza rasik sira nia transporte privadu atu halo servisu iha baze.
Daudaun ne’e sira planu hela atu koloka pesoál Guarda Floresta iha Suku 18 hodi kontrola rekursu naturais iha area protejidu, maibé sira nia funsionáriu la to’o hakarak ka lakohi iha Suku balun sira labele halo kontrola. Maski komunidade balun estraga rekursu floresta, maibé laiha intervensaun tanba menus rekursu umanu.
Bobonaru Hasoru Dezafiu
Funsionáriu Guarda Floresta munisípiu Bobonaru, daudaun ne’e hasoru dezafiu, tanba uza rasik sira nia transporte motorizada, hodi halo kontrola rekursu naturais iha area protejidu.
Koordenadór Guarda Floresta Munisípiu Bobonaru, Martinho Bilimau, informa ba Timor Post, hafoin partisipa formasaun iha Saun Ministériu Negósiu Estranjeiru no Kooperasaun Pante-Kelapa, Kuarta (28/02).
“Durante ne’e ami hasoru dezafiu maka menus funsionáriu, hodi koloka tuir Postu Administrativu no Suku ida-idak, ne’ebé identifika area protejidu, transporte mós laiha hodi fasilita Guarda Floresta, atu kontrola iha terenu, obrigada funsionáriu sira uza rasik sira nia motorizada atu halo servisu,” Martinho hateten.
Koordenadór ne’e rekoñese sira iha karreta ida, maibé kondisaun ladún presiza halo manutensaun maka bele foin tula sasán kontra bandu, ne’ebé guarda floresta sira kontrolu iha terenu prende husi komunidade sira.
Ho problema ne’ebé sira hasoru difikulta mós servisu, hodi kontrola másimu iha baze, liuliu iha area protejidu tanba ne’e maka sira husu ba Sekretariadu Estadu, atu bele oferese motor no koloka funsionáriu balun sira, nune’e apoiu servisu kontrolu iha area protejidu, atu komunidade labele estraga rekursu naturais.
Entretantu, hatán ba preokupasaun hirak ne’e, Sekretáriu Estadu Floresta, Fernandino Vieira da Costa, rekoñese katak ko’alia kona-ba rekursu umanu no menus fasilidade Instituisaun Estadu hothotu hasoru, maibé nafatin esforsu buka dalan oinsá atu bele rezolve iha tempu badak.
“Tanba ne’e maka ami sosa karreta no motor inklui hetan apoiu balun husi parseiru internasionál, Konservasaun Internasionál apoiu mós karreta no motor mai iha SEF, hodi apoiu fali ba guarda floresta iha munisípiu ne’ebé laiha karreta no motor, atu tula sira kontrola iha area protejidu sira”, nia hakotu.
11,760 total views, 12 views today
Bele hare Video Seluk :