DILI (timorpost.com)—Institutu Nasionál Kombate HIV-SIDA, (INCSIDA I.P-sigla portugés), sensibiliza informasaun ba estudante foun Universidade da Paz (UNPAZ) ne’ebé partisipa orientasaun atu hadook an hosi moras HIV-SIDA.
Informasaun ida ne’e Prezidente INCSIDA I.P, Daniel Marçal, informa ba jornalista hafoin ramata sensibilizasaun ba estudante foun UNPAZ iha Salaun Jose Casimiro UNPAZ, Tersa, (27/02/2024).
“Ohin UNPAZ halo orientasaun ba estudante foun tinan 2024 nian, ho ida ne’e Mak Ami hakarak fahe informasaun ba Estudante sira, atu nune’e sira bele asegura sira nia an iha prosesu aprendizajen, tanba estudante sira idade sei joven hela, laiha koñesimentu ida ke klaru Kona-ba HIV-SIDA nian, katak saida Mak HIV-SIDA?, HIV SIDA ne’e transmite hanusa, da’et hanusa, ho ida ne’e mak ami fahe informasaun balun ba Estudante sira atu nune’e bele preve an husi moras sira ne’e”, Daniel informa.
Nia hatete, atividade sensibilizasaun ne’e organiza ho di’ak, tanba servisu koordenasaun ne’ebé INCSIDA ho UNPAZ ne’e la’o ho di’ak, no konsege fahe informasaun kona-ba moras HIV- SIDA nian ba estudante foun sira ne’e.
Tanba tuir dadus ne’ebé maka iha, kuaze estudante barak ho idade 15 ate 24, no idade 25 ate 30, inklui idade 30 ate 40 mak afetadu maka’as ba moras HIV-SIDA.
“Estudante sira la kontinua sira nia eskola to’o hotu, ho ida ne’e mak INCSIDA koopera ho UNPAZ no entidade sira hotu, atu halo sensibilizasaun maka’as, no agora transmisaun ne’e la’ós dalan relasaun seksual de’it, maibé liu husi raan, ema sira ne’ebe mak gosta tato livre, hanesan ita nia joven sira dala ruma hemu droga mak foin ba tato”, nia hateten
Daniel afirma, asaun joven sira ne’e perigu, tanba daun ne’ebé mak sira uza hodi sona ema, ida ne’e sona tutan fali ba ema na’in-10, signifika uza daun ida de’it, nune’e maka INCSIDA presiza sensibilizasaun maka’as atu ema hotu-hotu bele hatene hodi proteje ba sira nia an hosi transmisaun HIV-SIDA.
Entretantu reprezentante estudante foun, Jose sarmento, kontente ho atividade sensibilizasaun ne’ebé maka INCSIDA halo ba sira, liga ho material kona-ba oinsá joven nasaun ida ne’e, hanesan estudante atu prevene an no hadook an husi moras HIV-SIDA, ne’ebe mak da’et ba ema seluk.
“Atividade ohin ne’e hanesan fanu ami joven sira, tanba esplika kona-ba moras HIV-SIDA nian, oinsá mak ami bele hadook an husi moras ne’e, ne’ebé ami agradese ba ekipa INCSIDA nian, ne’ebé mak ohin mai fahe informasaun ba ami estudante foun sira iha UNPAZ”, Jose hato’o agradese.
Nia subliña, liuhosi informasaun sira ne’e mak bele motiva sira oinsá atu uza tempu sira ne’e hodi estuda, labele komete ransu livre, no nu’udar estudante tenke kuidadu an atu kontribui ba dezenvolvimentu nasionál.
3,594 total views, 6 views today
Bele hare Video Seluk :