Dili(timorpost.com)—Sekretáriu Estadu ba Formasaun Profisionál no Empregu (SEFOPE), Rogério Araújo Mendonça, hasoru malu ho President e Autoridade RAEOA, Rogério Tiago Lobato, hodi ko’alia kona-ba abertura teste ba Kandidatu Traballadór sira no abertura ba estabelesimentu sentru formasaun lian Inglés ho Koreia iha Territóriu Timor-Leste, Sesta (23/02).
Iha hasoru malu ne’e Sekretáriu Estadu informa ba Presidente Autoridade katak, hafoin simu pose hanesan Sekretáriu Estadu, hala’o kedas vizita ba SEFOPE nian Diresaun Munisipál Sanulu-Resin-Tolu (13) Inklui RAEOA, hodi haree kondisaun Diresaun sira ba estabelesimentu sentru formasaun lian Inglés no Koreia. Iha vizita traballu ba Munisípiu sira, SEFOPE RAEOA maka sei hasoru dezafiu barak.
“Depois de simu pose ami halo vizita ba SEFOPE nia Diresaun sira iha Munisípiu 13 inklui RAEOA, ami haree SEFOPE Diresaun RAEOA la hanesan fali ho SEFOPE hosi Munisípiu sira seluk, uluk SEFOPE RAEAO hanesan Rejionál, maibé depois governu ne’ebé liu, muda fali ba Departamentu nia tutela ba SEFOPE Diresaun Munisípiu nia okos”, Sekretáriu Estadu Formasaun Profisionál no Empregu, informa ba Prezidente Autoridade RAEOA.
Nia salienta tan katak, hafoin halo identifikasaun, partisipasaun joven nian ba empregu rai laran no rai li’ur, Oekusi maka númeru ne’ebé ki’ik liu entre Munisípiu sira seluk.
“Depois ami identifika ita-nia kondisaun SEFOPE iha RAEOA, ema ne’ebé maka partisipa iha Empregu rai laran no rai li’ur, partisipasaun Oekusi ho nia númeru ne’ebé mak ki’ik liu entre munisípiu sira seluk. Tanba ne’e maka oportunidade ida ne’e, ita hakarak halo abertura teste eskrita ba Kandidatu Traballadór Timor-oan ba Austrália ita hahú realiza iha RAEOA”, Rogério tenik.
Hosi enkontru ne’e mós parte rua konkorda sei realiza Nota Intendimentu ida entre RAEOA no SEFOPE hodi bele fó apoiu ba joven sira liuhosi programa Grupu auto-empregu no sentru formasaun Bansone, hodi bele kapasita joven Oekusi oan sira nia kapasidade prepara ba merkadu indústria rai-laran no rai-li’ur.
Sekretáriu Estadu mós hateten, antes ne’e iha dadeer hasoru malu ho Koordenadór ZEEDOA, hodi ko’alia mós kona-ba asuntu kooperasaun ba iha futuru ba formasaun lian Inglés no sei apoiu atividade formasaun ho atividade sira seluk.
Notísia ne’e Timor Post asesu liuhosi pájina facebook Média Sekretáriu Estadu ba Formasaun Profisionál no Empregu (SEFOPE) nian, Sábadu (24/02).
2,958 total views, 3 views today
Bele hare Video Seluk :