DILI, (timorpost.com)– Ministériu Públiku (MP) liuhosi, Prokuradór, Matias Soares, promove krime 9 ba arguidu jerente klínika Moris Foun na’in-3 mak hanesan, krime kontrabandu, krime deskamiñu, krime bem ka merkadoria nia importasaun no exportasaun ilísita, krime fraude Fiskál, krime flasifikasaun dokumentu téknika, krime falsifikasaun dokumentu agravada, kontra fasaun de Sevos coinhos markas ou carselas, kríme produtus adulteradus no krime Omesídiu neglijente, ne’ebé sita iha kódigu penál artigu 316, 317, 315, 314, 303, 304 no 310 no 214 no 140.
Jerente klínika Moris Foun ho inisiál DIVS, JP no HdC tanba deskonfia hatama no fa’an aimoruk ilegál item 150, laiha koñesimentu husi Ministériu Saúde.
Defeza ba arguidu sira, Alvogadu Privadu José Pedro Camões, hatete liga ba kazu ne’e Tribunál foin rona arguidu na’in-1, no arguidu rekoñese katak nia na’in ba empreza klínika Moris Foun, arguidu rua seluk seidauk rona, tanba kestaun tempu, tanba arguidu na’in-3 hakarak hili direitu ko’alia hotu, entaun presiza tempu ne’ebé naruk, inklui mós arguidu rua seluk ema estranjéiru entaun presiza mós halo tradusaun, tanba prosesu primeiru interrogatóriu ne’e han tempu uitoan.
“Ho ida-ne’e, tribunál liuhosi juis turnu José Maria deside hadi’a hikas prosesu primeiru interogatóriu ne’e ba orsida iha oras 02:00 lokraik hodi kontinua rona arguidu rua seluk, maibe posibilidade desizaun ba kazu ne’e bele aban (Domingu) ou bele bainrua (Segunda)”, dehan Advogadu privadu José Pedro Camões ba jornalista sira iha Tribunál Judisial Primeira Instánsia Dili (TJPID), Sabadu (24/02).
Defeza ne’e hatete, nia parte hakarak esklarese ba públiku sobre kazu ida-ne’e katak, klínika Moris Foun ne’e fa’an aimoruk, aimoruk balun importa husi rai-liur no aimoruk balun sira hola iha Dili laran tanba nesesidade pasiente nian.
“Ita-nia pasiente sira moras, depois ba halo tratamentu iha Ospitál no inklui SAMES laiha aimoruk, entaun médiku sira rekomenda reseita ba iha pasiente sira hodi bele ba hola iha klínika Dili laran, maibe ema moras presiza aimoruk, entaun pasiente sira tenke ba sosa aimoruk iha klínika sira, loos duni regras ne’e tenke iha autorizasaun fa’an aimoruk iha Timor ne’e regra boot no klínika sira la fásil atu hatama aimoruk, tanba ne’e dalaruma sira klínika prátika aktu sira ne’e”, advogadu ne’e esklarese.
Tuir nia, iha sala julgamentu ne’e, Ministériu Públiku hatete katak, jerente klínika Moris Foun na’in-3 ne’e hatama no fa’an laiha lisensa husi Ministeriu Saúde rasik, nune’e mós laiha autorizasaun deteta fa’an aimoruk signifika sira la selu taxa, tanba laiha lisensa maibé liga ba kazu ne’e ita bele dehan foin inísiu ba iha krime sira ne’ebé promove ba sira maibé prosesu investigasaun hafoin bele hatene loos.
“Ha’u hakarak mensajen ba ita hotu mak ne’e, médiku iha Timor-Leste halo prátika iha klínika ka hospitál sira, banhira aimoruk laiha sira rekomenda reseita, entaun ita-nia populasaun tenke rekore ba amór sira ne’e ho sira posibilidade mesak entaun ita tenke eskola ema ne’ebé moras hela ka kompra ho viola ita la selu taxa ka viola regra ne’e, nia porsentu ne’e ki’ik hela, maibé salva ema ne’e valór boot tebes”, dehan nian.
Nia dehan, liga kazu ne’e indísiu laiha ligasaun ho empreza ida ka laiha ligasaun ho notísia sira ne’ebé agora espailla hela iha públiku maibé sira laiha autorizasaun ba aimoruk item balun ne’ebé populasaun presiza duni aimoruk ne’e.
“Prosesu primeiru interrogatóriu sei la’o hela, maibé hakarak hatete katak husi aimoruk item 150 ne’e, maibé husi númeru ne’e 60% ne’e iha lisensa, maibé iha item uitoan mak laiha lisensa, tanba moras espesiál no aimoruk espesiál ne’e ita labele hola kontainer ida, ita presiza hola uitoan de’it, atu nune’e oinsá bele salva pasiente sira-nia vida”, nia akresenta.
Entretantu iha loron 21 fulan-Feveréiru tinan 2024, iha oras lokraik, Polísia Nasionál Timor-Leste liuhosi Investigasaun Kriminál hamutuk ho ekipa tékniku Ministeriu Saúde nia, ezekuta mandadu husi tribunál hodi halo detensaun no aprensaun buska konsege prende aimoruk item 150 ne’ebe hatama no fa’an ilegál laiha lisensa husi Ministériu Saúde.
Nune’e iha altura ne’eba mós PNTL liuhosi Investigasaun Kriminál konsege kaptura jerente klínika Moris Foun na’in-3, hodi halo investigasaun no kontinua detein durante 72 oras hafoin submete ba iha Primeiru Interogratóriu iha Tribunál Judisiál Primeira Instánsia Dili.
Iha prosesu Primeiru interogatóriu ne’e, prezide husi juis singulár, José Maria, no Ministériu Publiku representa husi Prokuradór, Matias Soares, arguidu ni’an-3 hetan asisténsia legál husi advogadu Privadu, José Pedro Camões ho Januario Martins.(*)
1,236 total views, 3 views today
Bele hare Video Seluk :
Subscribe to Timorpost
