Hakerek Na’in: Domingos Maia.
Belun doben LA sira:
Hafoin observa tiha atividade sira Vizita Cruz Jovem nian hosi Komunidade ka Aldeia balun, iha Paróquia Letefoho, haree hosi dook, ha’u admira tebes ho ambiente ne’e, enjeral.
Eih, hatudu duni ambiente solenidade ida triunfante iha prosisaun sira.
Kasian, maske iha, la haree diretu atividade sira parte espiritual nian hanesan Formasaun no Selebrasan Litújiku Sakramental sira.
Maibé pergunta balun atu ita reflete-hamutuk nia sentidu teolójiku espiritual nian liuhosi atividade relijioza ida ne’e hosi aspetu tolu : Social- serimonial; Estétiku Vizual no Ritualismu Kultural. Ita fihir idak-idak:
1. Ida dal-uluk, mak aspetu Social-serimonial nian:
Hosi liur, haree ba asaun sira ema nian hatudu rezultadu mesak furak- kmanek (solene) tebes, halo ema sarani sira haluha tiha sura kolen ba servisu no gastu material sira, inklui mós kontribuisaun osan hosi parte hotu-hotu.
Ho ne’e hotu, sarani sira bele asisti duni ho ksolok ambiente festa solenidade ida ne’e. Maibé pergunta mak ho aspetu ida ne’e, bele sukat ona susesu hosi aspetu espiritual nian? Hein lai …!
2. Segundu, mak aspetu Estétiku-Vizual (keindahan ka maravilha) liur nian:
Haree hosi liur, mak ba matan- melek sira, haree mesak nabilan, halakan no hafurak tiha ambiente festa Cruz Jovem nian ho enfeite kór rebo-rebo no oin-oin hodi hatudu motivu fiar no Liturjia Kreda Katólika nian. Atu kompriende ka lae nia sentidu- klean sira, dehan problema ikus nian. Kal loos?
3. Terseiru, mak aspetu Ritualismu- Kultural nian:
Ho introdusaun iha atividade relijioza Cruz Jovem nian ne’e mak ritual simbóliku sira hosi tradisaun kultura nian balun hanesan: Foder, sedgala, halolo dadoli lia-murak, bidu, karik tebe no ho uza símbolu aitosa-lulik kultura nian.
Pergunta nebé atu orienta inklinasaun sarani sira nian, maka ho atividade hirak ne’e hotu atu :
— Lori kultura- na’in sarani sira ba horik-fatin kmook ida nebé lós?
— Lori emar sira ba mantein nafatin prátika idolatria iha kultura?
— Ou lori ba dalan inkulturasaun nu’udar babolun Maromak (chamamento de Deus) nian ba valor espiritual kristaun nian tuir Kreda no Magistério Igreja hanorin maka:
— Sarani sira- nia moris-hi’as iha Kristu Jesus (1Kor 6: 14).
Ho nia objetivu esensial mak atu simu Jesus Kristu nu’udar :
— Na’i Mesan/Únivo (1Taw 16:14; Slm 195: 7);
— Mesias (Mat 16: 16) no Maksoi (Ats 5: 31);
— Roman mundu nian (Jo 8: 12; 9: 5);
— Dalan’loos, Lia’loos no Moris’loos (Jo 14,6);
— tuir haklaken nanis ona hosi Futarlia ka Bíblia nebé ladauk kaer nú Matadalan sarani nian, ( 2Tim 3: 16-17).
Atu dehan de’it katak: Aspetu moris tolu, nebé deskreve tiha ona, bele simu no hala’o bainhira sai nú dadalan ka meiu ida de’it; la’ós mak nia dalan-rohan ka finalidade.
Bainhira la satan-netik tendénsia hosi lala’ok-kleuk sira, mak sei la hadai dalan- rohan ou finalidade Vizita Cruz Jovem nian.
Dal-ida tan, belun sira: Tenke soi matan-moris no neon-na’in nafatin, basá babeur diabu nian haklatak iha atividade sira hotu nebé haree mesak furak-kmanek no atraiente hodi halasu sarani sira sai nia “presa/mangsa”, (1Pdr 5: 8).
Tan ne’e, tenke aprende tan sai matenek atu harii mak fiar- loos ho atividade kultu serimonial sira nebé seletivu, la lori ita hakat liu kaketan sentidu limitadu hosi aspetu sira soi karater sosial, estétika no ritual kultura liur de’it. Amin.
2,757 total views, 3 views today
Bele hare Video Seluk :
Subscribe to Timorpost
