DILI (Timor Post) – Ministru Obras Públikas, Abel Pires, hatete projetu husi Estrada diresaun rotunda Metiaut ba Dolok-oan ka Kristu-Rei kotuk ne’e paradu tanba inklui ho projetu (143) ne’ebé problema hela.
“Ida ne’e tama hotu iha projetu (143), ne’ebé iha problema hela ne’e, tanba ne’e agora ita halo hela identifikasaun, maibé agora iha ona Konsellu Administrasaun Fundu Infraestrutura (KAFI),” nia hateten iha Palásiu Governu, Kuarta (24/08).
Nia dehan, projetu 143 ne’e to’o agora problema no paradu inklui dalan ba Dolok-oan ne’e tanba Oitavu Governu Konsidera Ilegál no laiha akordu legál ruma molok projetu sira ne’e la’o, ho ida ne’e Governu sei la selu kompañia sira ne’ebé kaer projetu sira refere.
“Dalan atu ba Dolok-oan ka Kristu-Rei kotuk ne’e iha rua, ida mak liuhusi oin ne’e no seluk mak liuhusi rotunda Metiaut nian sa’e ba, maibé ida liuhusi Kristu-Rei oin ne’e tama ona ba pakote Turizmu nian, entaun rezolvidu, tanba sira husu labele asesu estrada liuhusi oin ne’e ba to’o kotuk, tanba hakarak dalan asesu ne’e ida de’it, mak liuhusi Metiaut nia ne’e,” dehan nia.
Tanba ne’e Ministru ne’e subliña, sira-nia parte mós konkorda tiha ona ho parte Turizmu nian, tanba sira asina ona kontratu, no Konsellu Ministru mós aprova tiha ona projetu atu reabilita sítiu turístiku Kristu-Rei.
“Sei laiha tan estrada husi Kristu-Rei nia oin ba mosu iha kotuk Dolok-oan ninian, maibé estrada mak liuhusi Prezidente Repúblika, José Ramos Horta nia uma oin leten ne’e,” nia deklara.
Maibé, nia dehan estrada ida liuhusi leten ne’e problema hela tanba, tama hotu iha projetu (143), ne’ebé problema hela ne’e, maibé sei halo identifikasaun hodi bele rezolve atu nune’e estrada ne’e bele di’ak.
“Kona-ba realiza projetu sítiu turístiku Kristu-Rei ne’e bele realiza ona iha tinan ida ne’e, maibé projetu ne’e tama iha Ministériu Turizmu Komérsiu no Indústria (MTKI) nian, la’ós iha Obras Públika nia projetu,” nia hakotu.
2,133 total views, 3 views today
Bele hare Video Seluk :
Subscribe to Timorpost
