OEKUSI (timorpost.com) – Konsellu Imprensa (KI) servisu hamutuk ho ABCID distribui sertifikadu ba jornalista na’in-24 husi rádiu, televizaun, jornál, online, inklui rádiu komunidade sira husi munisípiu 14 hafoin partisipa formasaun fundamentu jornalizmu báziku durante loron tolu.
Prezidente KI, Otelio Ote, hatete, formasaun jornalizmu fundamentais ne’e hodi eleva no hasae koñesimentu jornalista sira nian oinsá halo kobertura iha terenu uza kódigu étika no hakerek notísia ne’ebé iha faktu no dadus kompletu antes publika notísia ba públiku.
“Ami fahe sertifikadu ba jornalista hamutuk 24 husi rádiu, televizaun, jornál, online, inklui rádiu komunidade husi munisípiu 14 ne’ebé durante tuir formasaun fundamentais báziku durante loron 3 nia laran,” Otelio Ote hateten hafoin termina serimónia distribuisaun sertifikadu ba jornalista iha salaun Santa Rosa Madre Dominikana Oekusi Ambenu, Kuarta (16/08).
Prezidente KI ne’e dehan, formasaun ba jornalista sira hanesan parte ida husi KI nian, hodi fasilita formasaun ba jornalista atu hasae sira nia koñesimentu no abilidade oinsá atu bele halo notísia ne’ebé balansu, kredivel, independente hodi nune’e públiku labele kestiona.
Nia hatete, espera husi formasaun ne’e ba oin bele aumenta tan jornalista sira nia koñesimentu kle’an liután iha mundu jornalizmu maski dala barak jornalista tuir formasaun oi-oin, maibé presiza aumenta liután hodi nune’e bele komprende di’ak liután hodi hakerek notísia ne’ebé iha faktu no dadus kompletu.
Atu nune’e, públiku nafatin tau konfiansa iha media, tanba media mak sai matan no tilun ibun ba públiku tanba ne’e presiza kapasita formasaun ba jornalista sira aprende nafatin siénsia liuhusi mundu jornalizmu nian
Ikus liu, Otelio agradese ba parseiru ABCID ho nia kometimentu hodi fasilita ona formasaun jornalizmu fundamentais báziku ba jornalista na’in-24 ne’ebé partisipa formasaun durante loron tolu nia laran.
Iha fatin hanesan, formadór Michael Coggen no formadora Caroline Winder, ABCID Australia, sente kontente tebes tanba bele fasilita formasaun ba jornalista husi rádiu, televizaun, jornál, online no rádiu komunidade husi munisípiu 14 durante loron tolu.
“Tanba ne’e ha’u agradese no obrigadu ba KI tanba, bele servisu hamutuk ho ami hodi fasilita formasaun fundamentais hodi hanorin tékniku entrevista no hanoin matéria reativu no pro ativu no lei kódigu étika jornalista nian liga servisu iha rádiu, televizaun inklui media online”, nia hakotu.
1,533 total views, 3 views today
Bele hare Video Seluk :