Timorpost.com I MANUFAHI–Administradór Munisípiu Manufahi (AMM), hasoru malu ho lisan na’in no jerasaun Dom Boa Ventura inklui lideransa komunitária tanba dezintendimentu balun.
Objetivu husi enkontru ne’e hodi buka solusaun ba dezintendimentu entre lisan sira husi jerasaun Boaventura, kona-ba atu harii suku foun ho naran suku Leolaku iha postu administrativu Same.
“Ha’u rasik fó hela responsabilidade ba jerasaun avo Dom Boaventura husi mane no feto nian, katuas lia na’in sira ho lideransa komunitária suku Daisua atu organiza enkontru ho jerasaun no lisan na’in sira jerasaun avo Dom Boaventura” dehan Arantes iha salaun administarasaun Munisípiu Manufahi, Sesta (05/05/2023.
“Ha’u mós hetan fali informasaun husu katuas lisan na’in Lusin Koronel hato’o katak, atu harii suku foun ne’e ami entrega ba governu munisípiu atu tetu, tanba entre ami lisan husi avo Boaventura la iha ona dalan atu hasoru malu hodi ko’alia ba malu” nia hateten.
Maibé tanba Ministériu Administrasaun Estatál (MAE) fó hela kompeténsia mai administrasaun munisípiu atu bele konvoka enkontru ho lia na’in no jerasaun Boaventura nian liga ba proposta atu harii suku Leolaku.
Nia hatutan, atu harii suku Leolaku, harii ka la harii depende ba katuas lia na’in no jerasaun avo Boaventura nian, ba governu prontu de’it atu foti desizaun harii suku foun ne’e, tanba suku Leolaku iha ligasaun ho istória aswa’in Dom Boaventura, rezultadu inkontru ida ohin, administrasaun sei halo akta husi rezultadu enkontru ne’e, husi aprezenta fali ba governu sentrál” Arantes subliña.
Fatin hanesan Mário Boa Ventura Noronha hanesan Bei oan ás -wa’in Dom Boaventura, rejeita informasaun balun husi katuas lia na’in katak, sira laiha ona dalan atu hasoru malu.
“Ha’u la konkorda dehan ami laiha dalan, tanba to’o ohin loron ami seidauk tuur hamutuk atu ko’alia ba malu, hodi deside bele ka lae atu harii suku foun ne’e” nia preokupa.
“Tanba ne’e katuas lia na’in husi lisan 5 leten no lisan na’in 6 husi kraik, ita sei tur hamutuk fila fali hodi rezolve dezetendementu uma laran nune’e hodi buka solusaun ba atu harii suku Leolaku, ita konkorda malu tiha maka aprezenta mai governu munisipiu” dehan nia.
Nune’e Koordenadór jerál kulturál husi fatin rua jerasaun dom Boaventura, Leonel da Costa Seixas hakle’an, nu’udar inan-aman husi asu-wa’in Dom Boaventura hein deit desizaun husi governu.
Baihira rezolve buat sira ne’e ita bele buka solusaun hodi deside hamutuk, tanba agora daudaun partisipa iha enkontru ne’e, lisan na’in husi leten no karik maioria partisipa hela de’it katuas lisan na’in 4 maka la partisipa, maibé lisan 7 partisipa hotu.
“Tanba ne’e ha’u deskorda husi lisan na’in balun dehan fali ami laiha ona dalan atu hasoru malu maibé ami sempre iha dalan atu hasoru malu hodi harii suku foun ne’e no ami prontu serbisu hamutuk” nia argumenta.
Iha okaziaun ne’e xefe suku Daisua postu administrativu Same, Amorin da Costa Sarmento hateten, nu’udar autoridade prontu simu orientasaun.
“Ha’u simu orientasaun husi Administradór Munisípiu atu konvoka enkontru ho katuas lia na’in sira husi jerasaun asu-wa’in Dom Boa Ventura nian husi parte kraik no leten” nia sita.
Tanba ne’e nu’udar autoridade konsege konvida no halo enkontru ona durante fulan 5 nia laran maibé la iha rezultadu, tanba balun partisipa no balun la partisipa.
“Administradór konvoka fali enkontru tanba atu harii suku Leolaku, husi parte estadu nian la prienxe kriteria tanba totál populasaun husi jerasaun Boaventura iha de’it ema rihun ida resin no husu parte kulturál atu harii suku Leolaku, presiza katuas fukun 5 husi parte leten no fukun 6 husi parte kraik tenke tuir hamutuk maibé durante fulan 5 xefe suku rasik konvida balun partisipa no balun la partisipa” nia relata.
Portantu hafoin administradór munisípiu Manufahi rona esplikasaun husi jerasaun no lia na’in sira nune’e adminisador foti desizaun fó fila ba katuas lia na’in ho jerasaun avo Dom Boaventura nian atu tur hamutuk fila fali hodi buka solusaun, ba dezetendemetu ne’ebé mosu.
Tanba atu harii suku foun, presiza katuas lia na’in sira ho jerasaun Dom Boaventura nian tur hamutuk hodi foti desizaun hamutuk no presiza unidade, tanba governu iha ona siniais diak balun atu harii suku Leolaku, tanba ligasaun ho istória asu-wain Dom Boaventura.
Entretantu rezultadu husi soru-mutu ne’e parte administrasaun munisípiu sei elabora akta rezultadu enkontru ne’e, hodi aprezenta fali ba MAE.(lcl).
1,575 total views, 3 views today
Bele hare Video Seluk :
Subscribe to Timorpost
