DILI (timorpost.com) — Judisial System Monitoing Programme (JSMP), husu Governu atu implementa polítika subsidiu Osan 200 USD, tenke tuir Lei Nú 37/2022, kona-ba subsídiu ba Uma-Kain.
“Ita hatene katak, iha 6 Maiu 2022, Konselu Ministru aprova Dekretu-Lei Nú 37/2022, kona-ba subsídiu tinan nia rohan (fim do ano) ba Uma-Kain ho montante 200 USD. Ministériu Solidaridade Sosiál no Inkluzaun (MSSI), hanesan institusaun Implementadór ne’ebé halo hela preparasaun ba pagamentu ne’ebé sei hala’o iha fulan Novembru no Dezembru tinan ne’e,” hateten Koordenadór Programa Observasaun Parlamentu Nasionál (PN), José Perreira, liuhosi Konferensia Imprensa iha resintu JSMP Kolmera, Kuarta (28/09).
Nia dehan, Polítika subsidiáriu ne’ebé prevee iha Dekretu-Lei ne’e, nu’udar transformasaun hanoin Estadu nian kona-ba oinsá bele kria justisa sosiál iha sosiedade nia let no igualdade tratamentu ba sidadaun hotu iha distribuisaun apoiu sosiál sira.
Tanba ne’e, iha Dekretu-Lei ne’e prevee katak, durante ne’e Estadu valoriza serbisu no esforsu funsionáriu no ajente sira Administrasaun Pübliku nian, hodi aprova no halo pagamentu estraordináriu ba saláriu adisionál ka saláriu fulan 13 iha tinan nia rohan.
Estadu mós iha parte ida, tuir lei ne’e, rekoñese katak, atribuisaun ba prestasaun serbisu ba traballadór sira instituisaun públiku sira Estadu nian kria ona dezigualdade no injustisa sosiál ba sidadaun sira ne’ebé la hetán asesu.
“Nune’e mak, objetivu husi Dekretu-Lei ne’e atu fó apoiu subsidiáriu ba uma-kain sira ne’ebé ekonómikamente vulnerável, tanba laiha serbisu no rendimentu fiksu no mós la asesu ba direitu no regalia sira, funsionáriu no ajente sira administrasaun públiku hetán, partikularmente pagamentu estraordináriu ba saláriu adislonál iha tinan nia rohan ka saláriu fulan 13 nian, ida ne’e signifika, benefisiáriu ka titulár ba subsidiu ida ne’e sei la inklui funsionáriu no ajente sira Administrasaun Publiku nian,” José relata.
José realsa tan, maibé iha notísia RTTL ne’ebé iha loron 15 fulan Setembru 2022, Vise Ministru Administrasaun Estatal (V-MAE) halo fali deklarasaun ne’ebé sees ka kontráriu husi Dekretu-Lei refere katak, subsídiu ne’e sei atribui ba uma-kain hotu no sei la haree kargu no tabela salariál.
Alende deklarasaun V-MAE nian ne’e, iha mós informasaun kredivel no Konfirmadu husi liña ministerial relevante sira katak, subsídiu ne’e atribui ba uma-kain hotu-hotu, inklui funsionáriu no ajente públiku, ne’e nu’udar orientasaun husi Konsellu Ministru.
Tanbá ne’e, bainhira MSSI halo tuir deklarasaun Ministru no orientasaun Konsellu Ministru nian ne’e, tuir JSMP nia haree sei hamosu situasaun hanesan ne’e, sei halo situasaun ida injustisa sosiál sai aat liu tan, tanba funsionáriu no ajente sira, Administrasaun Públika nian ne’ebé hetan ona pagamentu saláriu adisionál fulan 13 sei hetan tan subsídiu ida ne’e.
Governu rasik hatudu inkumprimentu ba norma lejizlativa sira ne’ebé nia rasik produs no ida ne’e sei kria prosedimentu la di’ak ba futuru. No sei hamosu malgastu signifikativu no desnesesáriu no mós hamosu prejuizu ba Estadu liuhusi Orsamentu Jerál Estadu, tanba ema ne’ebé la tama iha kondisaun vulnerável no laiha direitu tuir lei ka la’ós titulár, asesu hotu ba subsídiu ne’e.
lda ne’e hanesan mós forma ida insulta ba povu kbi’it laek (familia vulnerável liu) ne’ebé tuir lei konsidera nu’udar benifisiáriu alvu úniku. Nune’e sei prejudika esforsu sira nivel Estadu atu promove governasaun di’ak no kombate korrupsaun, tanba laiha polítika no jestaun ida ne’e di’ak no apropriadu ba uza orsamentu Estadu nian.
Rezolusaun Governu no Diploma Ministeriál sira ne’ebé Governu prodús hodi distribui subsídiu ne’e, la’ós aktu lejizlativu maibé aktu normativu no administrativu ne’ebé kria hodi implementa programa no politika jerál sira ne’ebé regula iha lei no dekretu-lei sira, tanba ne’e la bele altera no kontrátoriu ho Dekretu-Lei Nú 37/2022.
Tanba ne’e JSMP husu ba elementu Sosiedade tomak no partikularmente ba Sosiedade Sivíl, Mídia, Movimentu no Akadémiku sira hotu, atu haree no akompaña programa ne’e, tanba ida ne’e, ezije ida-idak ninia observasaun krítika, hodi asegura rekursu povu no Estadu nian, hodi implementa tuir lei no evita despeza desnesesáriu sira ne’ebé lori prejuizu ba Estadu no povu.
Rekomendasaun ba kualkér Governu no governasaun iha futuru, JSMP husu atu halakon tiha tipu programa no polítika subsidiáriu sira ne’ebé tuir JSMP hanoin la Sustentável no la eduka povu sai badinas no produtivu, maibé kria fali situasaun dependénsia ba Estadu, halo komunidade sai pasiva no la produtiva ne’ebé sei tau todan liu tan ba gastu sira Estadu no la kontribui ba hamoris no hasa’e ekonomia komunidade no dezenvolvimentu Ekonómiku,” José hakotu.
4,127 total views, 3 views today
Bele hare Video Seluk :
Subscribe to Timorpost
