DILI—Partidu Kmanek Haburas Unidade Nasional Timoroan (KHUNTO) ofisialmente dada-an husi koligasaun foun ne’ebé forma hamutuk ho CNRT, PD, UDT, FM no PUDD ne’ebé asina akordu koligasaun iha loron 22 Fevereiru 2020.
Liuhusi karta ofisiál ho karater importante ho númeru Ref.037/P.KHUNTO/IV/2020, ne’ebé asina husi Prezidente KHUNTO, Armanda Berta dos Santos ho Sekretáriu Jerál José Agostinho da Silva, dirize ba Prezidente Partidu CNRT nu’udar mós Koligasaun Foun, Kayrala Xanana Gusmão, haktuir, situasaun koligasaun AMP seidauk hetan konfirmasaun no aseitasaun husi Prezidente Repúblka Francisco Guterres Lú Olo hodi fó alternative ba formasaun governu dasia, tanba ne’e, KHUNTO haree ba situasaun polítika ne’ebé la’o durante tinan tolu laiha serteja, maka ho desizaun ne’e hanesan pozisaun polítika ba solusaun nian.
Iha karta ne’e mós hakerek KHUNTO nia konsiderasaun ba deklarasaun konfiansa husi Prezidente Repúblika ba Primeiru MInistru Taur Matan Ruak hodi lidera nafatin governu daualu.
“Partidu KHUNTO hola pate mós iha estrutura oitavo governu konstitusional nune’e desidi sei fó apoiu tomak ba oitavo governo konstitusionál to’o tinan 2023,” subliña iha karta ne’ebé Timor Post asesu.
Hatutan iha karta ne’e, desizaun ne’e KHUNTO ho konsiénsia rasik no hato’o agradese ba Xanana Gusmão nu’udar Lideransa Partidu CNRT no AMP ho Partidu PD, UDT, FM no PUDD, ne’ebé durante ne’e servisu hamutuk.
“Momentu importante ida ne’e iha situasaun difisil tebes mai Partidu KHUNTO atu foti desizaun, maibé tanba haree ba interese povu no ita nia estadu maka Partidu KHUNTO foti desizaun sai husi koligasaun AM foun,”salienta iha karta ne’e.
Entretantu relasiona ho kestaun ne’e, Prezidente Partidu CNRT, Kayrala Xanana Gusmão, Kuarta (29/04/2020) hahú husi lorokraik to’o kalan, lidera reuniaun urjente ho deputadu no membru governu sira husi partidu ne’e nian, iha Sede Nasionál CNRT, Bairro dos Grilhos, Dili.
To’o tuku 20:28, Timor Post seidauk konsege hetan objetivu husi reuniaun ne’ebé tuir observasaun haktuir, hetan partisipasaun husi membru governu no deputadu sira husi CNRT nian. (cao)
578 total views, 3 views today
Bele hare Video Seluk :
Subscribe to Timorpost
