DILI (Timor Post) – Vise Ministru Interiór (VMI), Antonio Armindo, konsidera rezultadu ikus hosi desizaun Tribunál Distritál Dili (TDD), nian ba ema sira ne’ebé lori droga hanesan motivasaun fali ba sidadaun sira atu kontinua lori tama mai Timor-Leste.
Nia hatene, nia parte lakohi komentáriu relasiona ho Tribunal nia desizaun ba ema ne’ebé hatama droga, maibé importante PNTL kontinua monta estratéjia no ekipa oioin hodi buka tuir ema ne’ebé konsumu droga no hatama mai Timor-Leste.
“Kuandu PNTL kaer halo investigasaun hotu entrega ba parte Ministériu Públiku no nia kompeténsia atu foti desizaun, maibé hanesan sidadaun ita hotu-hotu la kontente kuandu ema ida komete krime depois Tribunál fó de’it TIR (termo de identidade residênsia) no la fó sansaun todan, ema hanoin ita nia sistema judisiáriu laiha nehan atu tata sira,” dehan Vise Ministru Interiór, iha Faról Tersa (16/08).
Nia reforsa, entaun ida ne’e hanesan fó fali vantajen boot ida ba ema sira ne’ebé komete krime ne’e no ema seluk mós bele haree tuir hodi halo tan de’it krime sira ne’e.
“Tanba rezultadu sira hanesan ne’e sira hanoin aban nia kontinua halo bainrua nia mai aplika TIR, bain tolu nia ba halo tan depois mai aplika TIR nafatin,” lamenta António Armindo.
Nia subliña, maibé ida ne’e hanesan Tribunal nia desizaun, no nia parte mós labele ko’alia ka halo komentáriu tama liu ba iha área Tribunál ninia desizaun sira.
“Maibé tuir ha’u pesoál ninia haree ita-nia desizaun Tribunál presiza tenke rigor liután intermus husi aplika sansaun no kontrolu ba ema krime no droga sira ne’e,” nia deklara.
Maibé iha instituisaun ida-idak foti desizaun tuir ninia kompeténsia, ne’ebé desizaun ida ne’e Tribunál nia kompeténsia, entaun nia parte lakohi komentáriu ba sira-nia kompeténsia ida ne’e.
11,311 total views, 3 views today
Bele hare Video Seluk :