DILI (timorpost.com) — Gerda Verburg husi United Nation Assistant Secretary – General Coordinator Scaling Up Nutrition (SUN), husu Governu Timor-Leste (TL) atu investe barak liu tan iha seguransa ai-han nian.
Nia hatete, Timor-Leste sai ona membru SUN durante tinan rua ona, nune’e Timor-Leste sai ona hanesan parte husi membru 65 iha movimentu ne’e nia laran.
“Governu Timor-Leste halo ona serbisu barak hodi hadi’a no prevene mal-nutrisaun no investe barak liután iha seguransa ai-han no nutrisaun,” nia hateten hafoin enkontru ho Prezidente Repúblika (PR), José Ramos Horta, iha Palásiu Prezidensiál, Bairru-Pité, Tersa (29/11).
Nia dehan, investimentu ida ne’e hala’o serbisu hamutuk ou kolaborasaun di’ak entre Ministériu ne’ebé ligasaun ba nutrisaun seguransa ai-han, nune’e mós kolabora di’ak ho ONU, parseiru dezenvolvimentu sira hanesan doadór, setór privadu no sosiedade sivíl no nia (Gerda) haree katak iha Timor-Leste mós akadémiku, juventude sira ativu liu.
“Husi ne’e ohin ho Prezidente Repúblika, ha’u só mai fó valór tan de’it ba ninia lideransa hodi kria nasaun ida ne’e atu investe barak liu tan iha ema liu-liu iha nutrisaun. Tanba nutrisaun maka hanesan meius ida atu dezenvolve ita-nia dezenvolvimentu fíziku no kakutak, ho ida ne’e mak importante ba dezenvolvimentu nasaun nian,” Gerda relata.
Nia subliña, tanba depois harii demokrasia ou liberdade pás iha tinan 20 nia laran, ne’e agora tempu ona atu investe iha ema, nune’e ema bele sai hanesan parte ida atu lori dezenvolvimentu sosiál ba oin.
“Ho Prezidente ami ko’alia ho prioridade sira hanesan, primeiru oinsá foku liu tan ba fó Susu been inan nian, segundu maka ai-han ne’ebé seguru, terseiru kona-ba oinsá fó valór ba ema sira ne’ebé halo pratika di’ak liu tan iha area nutrisaun seguransa ai-han nian,” nia afirma.
Nia hatutan, ne’e inklui Pre-Eskolár no mós ba merenda eskolár, nune’e mós foku ba primeiru milfias atu nune’e bele prepara didi’ak labarik sira dezenvolvimentu kakutak.
“Nune’e ha’u hanesan hela konvensidu teb-tebes ho Xefe Estadu nia lideransa atu nune’e bele lidera dezenvolvimentu ida ne’e hodi investe di’ak liu tan iha povu para lori povu ne’e ba pás no prosperidade,” Gerda hakotu.
2,381 total views, 3 views today
Bele hare Video Seluk :