Dili (Timor Post) – Komisaun Organizadora Feira Tasi-Tolu, Grupu Cofetas, aban hala’o abertura ba atividade Mini Feira iha area Uma adat Tasi-Tolu, hodi prepara ba selebrasaun loron FALINTIL 20 de Agostu no loron konsulta popular 30 de Agostu 1999 ba dala-23, ho tema dignifika no valoriza Istória rezisténsia hodi hatutan ba jerasaun foun.
“Aban ami hala’o abertura ba atividade Mini Feira hodi prepara ba komemorasaun loron FALINTIL 20 de Agostu no mós 30 de Agostu loron konsulta popular,” Prezidente Cofetas, Alex Amaral, hateten ba Online Timor Post, iha Tasi-tolu, Domingu (07/08).
Nia dehan, atividade iha Feira ne’e maka, múzika rezisténsia, Kulturál, ami loke ho produtu lokál no mós Negosiante sira haruka sira mai tau sasán hanesan biti homan, tais, no Pasta, fatin dira prepara rasik, atu nune’e sira mós hetan netik rendimentu uitoan no Partisipa iha fatin ida ne’e hodi Selebra loron importante hirak ne’e.
Portantu iha atividade ne’e, artisti’a ba múzika maka Sico Ramelau, Abito Gama, Cidalia, Abio Salsinha.
Aban sira hala’o abertura ba atividade Mini Feira iha Segunda loron 08 Fulan Agostu tinan 2022, depois remata iha loron 04 Fulan Setembru tinan ida ne’e.
Alex dehan Partisipa másimu iha mini feira husi parte Autoridade sira hanesan Xefe Suku Komoro, Xefe Aldeia iha Tasi-Tolu hamutuk 14, sira maka partisipa iha enventu ida ne’e.
“Atividade ne’e primeiru maka ami-nia emprezáriu ne’ebé iha Aldeia 12 de Outobru ne’e rasik, no sira iha Tasi-Tolu ne’e apoiu uitoan, ba Ministériu Asuntu Veteranus nian sira-nia apoiu ba fundus uitoan, maibé ba montante ami hatama ona ami-nia proposta, maibe sira dehan de’it katak depois maka ami fó hatene ita boot sira, ne’ebé ami mós seidauk hatene orsamentu ne’ebé sira apoiu no prontu iha Ministériu ida hodi apoiu ba iha atividade ne’e”, nia konta.
Nia relata, Mini feira ne’e rekonesimentu sira hatama proposta no fó Karta ba iha Governu liuhusi Ministériu Turizmu Komérsiu Indústria (MTKI), Diretór Jerál Komérsiu no mós Prezidente Autoridade Munisípiu Dili (PAM), hodi sira hetan autorizasaun atu nune’e sira Partisipa iha abertura ida ne’e.
Tanba ne’e mini feira ida loke kalan ho loron, kalan atividade dansa kulturál, BG no ambulante oan sira ne’ebé prepara fatin ona ba sira atu nune’e sira Partisipa hotu iha atividade ida ne’e to’o remata.
“Ami konvida Komunidade Tasi-Tolu kada bairru hodi mai partisipa iha atividade Mini Feira ne’e, balun dada tali, halai karon, tata berlindus, maibé karik sira manan ami sei prepara premiu ruma hodi fó ba sira, no premiu no orsamentu ne’ebé ami fó ba sira ne’e ami seidauk defini loloos”, nia tenik.
Iha fatin hanesan Xefi Aldeia 12 de Outobru, Placido Marcal, afirma nia nu’udar Autoridade lokál, Inisiativa husi Feto no Mane ne’ebé kria atividade mini feira ida ne’e ba dahuluk akontesimentu iha tinan ida ne’e.
“Ha’u nu’udar Autoridade lokál senti agradese tebes tanba Juventude sira mós iha hanoin ne’ebé luan tebes ba futuru ho inisiativa hodi loke atividade mini feira iha fatin ida ne’e”, nia agradese.
Nia haktuir, razaun fundamental kria mini feira ne’e no mós atraksaun ho múzika rezisténsia rasik maka hanesan fó konvida ba Aldeia 14 iha Tasi-Tolu ne’ebé tutela iha suku Komoro nia okos hodi bele mai halo Kompleta múzika rezisténsia tuir kna’ar no kbiit ne’ebé Komisaun Organizador iha atu aplika primeiru premiu, Segundu no terseiru premiu ba vensedor sira.
“Ami-nia proposta indika ba Oitavu Governu Konstitusionál liuhusi Ministériu relevante sira, hodi nune’e apoiu ba iha atividade ne’e, maibé to’o agora resposta inserteza, sira dehan depois, entaun ho ida ne’e ami avansa uluk ho Kompaña lokál sira ne’ebé ezisti iha Aldeia 12 de Outobru, ami hamutuk hodi nune’e haree premiu ruma fó ba ita-nia jogus tradisionais ne’ebé Komisaun Organizador Prepara”, nia hateten.
Ikus nia agradese mós ba Juventude tomak liuliu iha Aldeia 12 de Outobru, Jeralmente ba Suku Komoro, karik ida ne’e maka programa no inisiativa di’ak tebes, no atividade ida ne’e sai ezemplu ba Aldeia hamutuk 14, ne’ebé tutela iha Suku Komoro.
2,156 total views, 3 views today
Bele hare Video Seluk :
Subscribe to Timorpost
