DILI (timorpost.com) — Relasiona ho publikasaun Jornalista Olandés nian kona-ba akuzasaun eis- Bispu Dili no Premiadu Nobel da Paz, Dom Carlos Felipe Ximenes Belo, SDB katak “Amu Belo” halo abuzu seksuál, Komité 12 de Novembru hakarak hato’o sira-nia apoiu no solidariedade ba Amu Belo.
Tuir Prezidente Komité 12 Novembru, Gregório Saldanha, hatete husi ne’e maka parte Komité 12 de Novembru ne’ebé uluk iha tempu funu koñesidu ho naran Juventude Loriku Asuwa’in, ne’ebé oras ne’e namkari iha organizasaun no partidu polítiku oi-oin, hakarak hato’o sira-nia apoiu no solidariedade ba Amu Belo.
“La’ós ami-nia kompeténsia atu hatete, akuzasaun ba “Amu Belo” ne’e los ka sala! tan ne’e, maka ami entrega no hakru’uk ba Santa Sé ka Vatikanu nia kompeténsia, maibé bele oinsá mós ami hamriik nafatin iha “Amu Belo” nia sorin, tanba ami konxiente katak, hanesan ser umanu “Amu Belo” mós bele iha nia frakeza ka sala ruma hanesan ema sira seluk,” nia dehan lia hirak ne’e iha Konferénsia Imprensa hala’o iha Resintu Komité 12 de Novembru, Balide, Sesta (30/09).
Nia dehan, se karik sala mós, “Amu Belo” nia sala individuál nu’udar frakeza umana, labele taka ka halakon fali “Amu Belo” nia hahalok di’ak barak ba povu no rai doben Timor-Leste iha tempu naruk no difisil ba kotuk.
“Ami husu ba ita-nia sosiedade ne’ebé uza média sira, hanesan face book ka seluk tan, atu lalika públika tutan akuzasaun abuzu seksuál AMU BELO ne’ebé sei fó de’it benefísiu ba ema seluk, no pelu kontráriu sei lori konsekuénsia la di’ak mai ita nu’udar ema katóliku, no nu’udar Timoroan, di’ak liu ita entrega no hakru’uk ba Santa Sé ka Vatikanu nia kompeténsia, Timor-Leste oras ne’e iha buat di’ak balu ne’ebé merese nu’udar sidadaun Timorense públika tutan, tanba lori benefísiu ba’a povu,” Gregório afirma.
Nia haktuir, Komité 12 de Novembru, iha tempu funu ba ukun rasik aan nian, hetan tulun, hetan defeza no protesaun, hetan solidariedade no korajen husi Igreja Katólika lideradu husi Bispu Dom Carlos Ximenes Belo.
“Ba maluk timoroan sira, liuliu Juventude loriku asuwa’in, ne’ebé oras ne’e namkari iha organizasaun ka partidu polítiku oi-oin sira, ami husu atu ita hotu reza maka’as ba “Amu Belo” ho família sira, reza ba Igreja katólika ho ema timoroan hotu ne’ebé hasoru problema iha ida-idak nia moris, hodi bele hamutuk no forte nafatin hasoru problema oi-oin, inclusive akuzasaun ba amu Belo,” Gregório hakotu.
5,205 total views, 3 views today
Bele hare Video Seluk :
Subscribe to Timorpost
