DILI (Timor Post) – Polisia Nasionál Timor-Leste (PNTL), liuhusi seksaun tránzitu rodaviaria, hodi kalan Kuarta (22/08), rejistu asidente ida iha Dare, Padre Abito José Brites Casimiro, lakon vida iha fatin akontesimentu.
“Insidente tráfegu ida iha Dare, hodi kalan purvolta tuku 08:30, envolve ita-nia amu Abito José Brites Casimiro, ho ita-nia sidadaun feto ho naran inisiál MSR mak ita-nia amu tula ho Motor, mak envolve iha insidente ne’e iha Dare, rezulta Amu mate fatin kedas,” dehan Komandante Seksaun Polisia Tránzitu Munisípiu Dili, Inspetór Xefe Domingos Sarmento Gama, iha nia knaar fatin Kaikoli, Tersa (23/08).
Nia dehan, iha asidente matebian kondús motor ho marka Jupiter ho nia Xapa matríkula E 8081, mak tula sidadaun feto ho naran inisiál MSR, mak hetan insidente ne’e.
“Ita-nia amu matebian ho sidadaun feto ne’ebé envolve iha asidente ne’e, tuir informasaun husi sasin ho sidadaun feto no inisiál MSR ne’ebé amu tula ne’e ho kondisaun la’ós kanek todan, maibé kondisaun di’ak uitoan, tuir informasaun katak baku hirus matan, entaun nia hirus matan mak moras,” nia konta.
Tuir deklarasaun husi sasin sidadaun feton ho inisiál MSR ne’e, katak matebian amu mak kondús ka lori motorizada ne’e rasik.
“Nune’e, tuir informasaun husi ita-nia sidadaun feto ne’e katak, amu mak SMS nian, entaun sira na’in-rua konvida malu atu ba han hahán ruma iha restaurante iha Dare nian, maibé sira na’in-rua iha dalan klaran haree ba rai kalan ona, entaun sira fila fali to’o iha dalan foun husi Dare nian tun mai liuhusi Mahoka nian uma leten ne’e mak halai sees, entaun soke moru ida ne’ebé halo penahan ne’e, entaun sira monu liubá iha valeta kuak,” nia dehan.
Nune’e mós tuir informasaun katak, amu matebian baku nia ulun, sira na’in rua uza kapasete, maibé dala-ruma kapasete la metin, entaun semo sai, baku ulun ba troatoar balun iha ne’ebá, entaun iha ne’e mak pankada makas.
“Iha asidente ne’e, sira konsege evakua amu ba iha ospitál, maibé la konsege salva nia vida no lakon vida,” nia dehan.
Nia hatutan, sidadaun feto ne’ebé tula ne’e, daudaun iha uma hela, ohin parte investigadór to’o uma, maibé tuir informasaun katak nia mós monu baku nia hirus matan mak moras, entaun sidadaun feto nia prezensa seidauk iha parte investigasaun.
“Sidadaun feto ne’e, eskola iha UNTL, ho idade 27, ne’ebé oras ne’e iha hela uma, ita husu nafatin para ita-nia sidadaun ne’e sei aprezenta an para depois ita foti deklarasaun, maibé ita mós la taka dalan, karik iha momentu asidente iha sasin ruma ka iha ita-nia ema haree karik, atu aprezenta hodi nune’e, ita foti mós deklarasaun para kompleta kona-ba asidente refere,” nia dehan.
Nia hatutan, “Evidénsia motorizada oras ne’e iha hela ita-nia edifísiu Komandu Munisípiu Dili, hodi kalan kedas asidente ne’e rasik, ita-nia invetigadór polisia tráfegu investigasaun to’o kedas iha fatin akontesimentu,” nia hakotu.
Enkuantu tuir media Timor Post Online nia observasaun ba evidénsia motorizada ne’ebé lori ona mai iha Komandu Polísia Munisípiu Dili, ne’e nia kondisaun di’ak hela.
Biografia Saserdote Abito José Brites Casimiro
“Ha’u Nunka Haluhan Ó Is. 49.15”, Padre Abito José Brites Casimiro, moris iha Aldeia Ailelo, Suku Giolima, Postu-Administrativu Hatulia, Munisípiu Ermera iha loron 06 fulan Fevereiru Tinan 1985. Oan husi Zeferino Casimiro no Saturnina Martins.
Tuir Biografia badak ne’ebé Timor Post Online, asesu iha Tersa (23/08), katak Padre Abito nu’udar oan dalimak husi maun alin nain-10, Aurélia Mascarinhas, Fernanda Mascarinhas, Augusta Martins (Matebian), Padre Abito José Brites Casimiro (matebian), Olinda dos Reis, Adelina Martins, Irmã Olandina Casimiro Mascarinhas, CB. Bernadino Soares Casimiro, Boby Casimiro (matebian) no Celeste Soares Casimiro (matebian).
Iha loron 06 fulan Jullu tinan 1986 simu sakramentu Batizmu husi Rev. Pe. Mario do Carmo Belo (matebian), iha misaun antiga Igreja São Francisco Xavier Hatulia.
Iha loron 18 fulan Setembru tinan 1993, simu sakramentu Primeira komuñaun husi Rev. Pe. Mario do Carmo Belo, iha Igreja São Francisco Xavier, Nartuto.
Iha loron 18 fulan Novembru tinan 2007 simu sakramentu Krizma husi Reverendísimu Bispu Dom Alberto Ricardo da Silva (matebian), iha Igreja Parókia Sagradu Korasaun de Jesus, Bekora.
Iha Tinan 1993 too 1996, hala’o nia estudu Pre-Primária SDN no. 58 Tata Ailelo hafoin muda hikas ba iha Eskola SDN no. 30 Garuda Hatulia. Iha tinan 1996 to’o 1997 labele kontinua nia estudu tanba hetan presaun no tortura husi militares Indonézia. Nune’e iha tinan 1997 to’o 1998 hahú hikas fali nia estudu iha eskola SDN no.58 tata Ailelo.
Iha Fulan Maiu 1998 tanba situasaun funu nune’e Pe. Abito ho família halai sai ba hela iha ai-laran Sosiedade Fatubesi to’o tinan 1999 to’o mosu Referendum ba Timor oan. Nune’e mak iha tinan 2000 to’o 2003 hahú fali nia estudu Pre-Sekundária iha eskola Públika loron 20 fulan Setembru, Hatulia.
Remata tiha nia estudu Pre-Sekundária iha tinan 2003 to’o 2006 kontinua estudu Ensinu Sekundáriu iha eskola Públiku 10 de Dezembru, Komoro, Dili au mezmu tempu ajuda mós iha Programa istória ba Futuru, iha Casa de Produção audio visual ou CPA, Cina-Rate, Taibessi Dili.
Iha loron 23 fulan Setembru tinan 2006, hahú nia estudu iha Semináriu Menór Nossa Senhora de Fátima, Balide to’o Fulan Jullu tinan 2007.
Iha loron 4 fulan Outubru tinan 2007 to’o loron 4 fulan Agostu tinan 2009 hala’o nia estudu iha Semináriu Ano Propeudêutico ou Ano Espiritualidade São João Maria Vianney, Bekora.
Iha loron 27 fulan Setembru tinan 2009 to’o loron 30 fulan Outubru tinan 2016, kontinua nia formasaun ba vida saserdote nian iha Semináriu Maiór Interdiocesano São Pedro no São Paulo, Fatumeta, Dili.
Iha tinan 2009 too 2013 hasai Kursu lisensiatura Filozofia iha Institutu Superior Filozofia no Teolojia Dom Jaime Garcia Goulart, Fatumeta, Dili. Ne’ebé konklui ho Traballu konkluzivu ho títulu A Ética Segundo Santo Agostinho.
Iha tinan 2015 too 2016 hasai kursu lisensiatura Teolojia iha Institutu Superior Filozofia no Teolojia Dom Jaime Garcia Goulart, Fatumeta, Dili. Ne’ebé konklui ho Traballu konkluzivu ho títulu A Esperança do Novo Céu e a Nova terra, segundo o livro Apocalipse Capítulo 21:1-8.
Iha loron 29 fulan Juñu tinan 2013 simu Orden Leitoradu no Akolitadu, iha Semináriu Maiór Interdiocesano São Pedro no São Paulo, Fatumeta, husi Reverendísimu Bispu Dom Norberto do Amaral (Bispo Diocese Maliana) iha festa Solenidade São Pedro no São Paulo nian loron.
Iha loron 06 fulan Novembru tinan 2013 to’o loron 8 fulan Janeiro tinan 2015, hala’o Pastoral Filozofia nian iha Centro Publicação da Diocese Dili ou SEARA, Casa de São João Paulo II Lecidere. Iha tempu hanesan hala’o mós Asisténsia Pastoral iha Parókia Santa Teresinha do Menino Jesus, Bedois.
Iha loron 8 fulan Janeiro tinan 2017 to’o loron 18 fulan Janeiru tinan 2018, hala’o Pastoral Teolojia nian iha Emisora Katólika Radio Timor-Kmanek Lian Nain Feto, Maloa, Ailok-Laran, Dili. Au mezmu tempu tulun mós iha Kapela Monumentu São João Paulo II, Tasi-Tolu no tulun mós iha Programa Roman Domin, iha RTTL.Ep.
Iha loron 19 fulan Janeiru tinan 2018, hala’o Pastoral Pre-Diákonu nian iha Parókia Santo António, Motaél Dili.
Iha loron 19 Fulan Marsu tinan 2017 iha loron Solenidade São José Esposo de Virgem Santa Maria, simu ordenasaun Diakonál husi Reverendísimu Dom Virgílio do Carmo da Silva, SDB., Bispu da Diocese Dili iha Sé Katedrál Dili no kontinua hala’o pastoral Diakonál nian iha Parókia Santo António, Motaél.
Iha loron 27 fulan Novembru tinan 2018, simu Ordenasaun Saserdotál husi Reverendísimu Dom Virgílio do Carmo da Silva, SDB., Bispu da Dioseze Dili iha Igreja Parókia Nossa Senhora da Graça, Gleno, Ermera no lema ba Na’i-lulik nian mak “Ha’u Nunka Haluhan Ó foti husi livru profeta Isaias 49.15”.
Iha tinan 2019 to’o ohin loron hala’o Kna’ar nu’udar Economato iha Semináriu Maiór Interdiocesano São Pedro no São Paulo, Fatumeta, Dili no iha loron 22 fulan Agostu tinan 2022 iha Memória Nossa Senhora da Rainha Padre Abito José Brites Casimiro, husik hela ema hotu hodi fila hikas ba Aman Maromak nia Kadunan Santo.
6,001 total views, 6 views today
