DILI, (timorpost.com)— Asosiasaun Akadémiku Estudantíl Fakuldade Direitu (AAEFD) iha Universidade Nasionál Timor-Leste (UNTL) krítika dosente sira iha Fakuldade Direitu tanba viola regra universidade nian, liuliu tarde publika valór estudante sira-nian.
“Problema ne’ebé estudante sira infrenta mak hanesan, dosente sira publika nota atraza, problema ida-ne’e estudante sira sempre infrenta iha direitu bainhira realiza tiha ona ezame finál. Dosente ne’ebé sempre komete aktu ida-ne’e mak Profesór, Júlio Crispin, ne’ebé nu’udar profesór titulár ba Kadeira Lójika, Teoria Jerál de Direitu Sivíl (TGDC, sígla Portugés), Direitu Real no mós Filozofia de Direitu no Asistente Profesór Júlio Crispin nian, Profesór João Sarmento. Iha faktu hatudu katak estudante 2º anu iha tinan 2021 halo ezame TGDC laiha tinan 2021 maibé nota publika iha tinan 2022, enkuantu estudante 1º anu sira iha tinan 2022 halo ezame kadeira Lójika iha tinan 2021 maibé notas publika iha tinan 2023”, Portavós, Cristovão de Araujo, hato’o liuhosi konferénsia imprensa iha kampus UNTL, Sentrál, Tersa, (02/04).
Tanba ne’e nia hatete, ho situasaun dosente publika nota tarde ne’e sai preokupasaun boot ba estudante Fakuldade Direitu, liuliu iha kadeira Direitu Prosesuál Penál no Direitu Komersiál.
“Kazu refere akontese ba estudante finalista tinan 2024, ne’ebé realiza teste iha tinan 2022, maibé nota seidauk publika to’o agora, aleinde ida-ne’e notas ba kadeira Direitu Prosesuál Penál no Direitu Komersiál I no II mak hanorin husi profesór Josê Tomas Alves, to’o agora seidauk publika, maske estudante seidauk finalista tinan 2024, realiza ona ezame iha tinan 2022”. Nia dehan.
Bainhira estudante konfirma ho profesór, Josê Tomas Alves, ne’ebé hanorin matéria Komersiál I no II, profesór hatete bainhira halo defeza monografia mak foin publika notas. Situasaun ida-ne’e akontese mós IV anu tinan 2023 ne’ebé realiza ona ezame ba kadeira Direitu Prisesuál Penál iha fulan-Dezembru tinan 2023 maibé to’o agora notas seidauk publika.
Entretantu AAEFD-UNTL hanesan organízmu ida husi Fakuldade Direitu ne’ebé konstrui nu’udar organizasaun estudantíl ida husi Fakuldade Direitu ho misaun prinsipál mak atu defende direitu no interese estudante nian no mós reprezenta estudante sira hodi koordena ho estrutura Fakuldade hodi buka solusaun ba defikuldade sira, liuliu preokupasaun, lamentasaun no problema sira ne’ebé estudante sira infrenta iha ambiente fakuldade nian, prinsipalmente iha prosesu ensiñu aprendizajen.
Bazeia ba misaun suprasitada ne’e mak AAEFD liuhosi órgaun governasaun asosiasaun nian halo reuniaun jerál ho estudante sira no identifika problema lubuk sira ne’ebé estudante direitu sira infrenta durante sira-nia estudu iha fakuldade.(*)
2,118 total views, 6 views today
Bele hare Video Seluk :
Subscribe to Timorpost
