DILI (timorpost.com)— Ministériu Solidariedade Sosiál no Inkluzaun (MSSI), prevee orsamentu ho montante dollar Amerikanu millaun 5 ba programa Bolsa da Mãe Jerasaun Foun (BMJF) Kondisional tinan 2023.
Tanba ne’e, MSSI ohin Segunda-Feira (18/09/2023) halo ona lansamentu no re-ajustamentu ba Bolsa da Mãe Jerasaun Foun (BMJF) kondisional tinan 2023.
Bolsa da Mãe Jerasaun Foun (BMJF) kondisional harii tinan barak ona, dezde IV Governu agora IX Governu kontinua iha munisípiu 13 inklui RAEOA.
“Ne’e Governu prevene orsamentu purvolta 5 millaun ba benefisiáriu 55.185 iha territóriu nasionál,” Ministra MSSI, Veronica das Dores, informa, ba Jornalista iha Salaun MSSI Kaikoli, Segunda-Feira (18/09/2023).
Governante ne’e re-afirma, programa BMJF kondisionál ne’e elejibilidade bazeia ba dekretu lei nú.18/2012 loron 4 Abríl no artigu 31 define katak durasaun ka agregadu ba família sira.
Nu’udar benefisiáriu iha programa apoiu kondisionál bolsa da mãe jerasaun foun durante tinan rua.
Nune’e, depois tinan rua benefisiáriu presiza atualiza informasaun no situasaun atuál ne’ebé família sira hasoru para rezolve.
“Tanba ne’e ohin ami halo lansamentu no re-ajustamentu no entrega material tékniku sira,” Ministra Veronica das Dores hateten.
Nia afirma, total funsionáriu ne’ebé atu halo re-ajustamentu hamutuk 492, ne’e kompostu hosi nasionál 107 no funsionáriu sira ne’ebé servisu iha sentru solidariedade no munisipál hamutuk nain-385.
Alende ne’e, MSSI halo koordenasaun ho Ministériu Finansas, Ministériu Administrasaun Estatál (MAE) no Patrimóniu Estadu atu nune’e fó apoiu transporte motor trail nesesidade no kapasidade Governu nian.
Nia informa, durasaun ba programa BMJF kondisionál ne’e durante semana rua iha Fulan Setembru 2023.
Tanba ne’e, husu ba família Vulneravel no Kbiik Laek sira hakbesik aan Sentru Solidariedade iha Munisipál sira para hetan diretu ba programa BMJF kondisionál nian.
1,176 total views, 3 views today
Bele hare Video Seluk :
Subscribe to Timorpost
