DILI (timorpost.com)—Prezidente Komisáriu Ezekutivu Banku Nasionál Komersiál Timor-Leste (BNCTL-Portugés) Antonino Francisco Vitor hatete, relasiona ho osan bolsa da mãe ba estudante sira ne’ebé la iha konta bankária, BNCTL sei transfere direita ba eskola mak sei responsaliza.
“’Estudante bolsa da mãe ne’ebé la iha konta bankária, BNCTL sei transfere direita ba parte eskola mak sei responsabiliza. Ne’e akordu. Osan iha maibé estudante barak seidauk iha konta bankária tanba ne’e dalan seluk mak haruka ba pate eskola hodi hare tuir lista alunu/a sesé mak iha lista ne’e bele rezolve, “dehan Antonino ba jornalista sira iha Novo Turizmu, Segundu (20/11).
Prezidente BNCTL ne’e haktuir, prosesu ba pagamentu parte BNCTL ho Ministériu Edukasaun asina tiha ona, tanba ne’e sei transfer osan ba eskola ninia konta, depois maka eskola mak selu ba estudante sira ne’ebé benefisiáriu.
“Ita transfer osan ba eskola ninia konta, depois maka eskola mak selu ba nia estudante sira ne’ebé benefisiáriu, “dehan nia
Komisáriu BNCTL ne’e akresenta, Parte ME ho BCTL asina kontratu para estudante sira ne’ebé atu simu ne’e tenke iha konta bankária, bainhira laiha maka labele transfer osan ne’e ba sira.
“’Osan ne’e Governu nian, osan la’ós banku nian, BNCTL hanesan ponte de’it Governu selu liu husi banku maka banku transfer osan ba benefisiáriu sira nia konta”.
Iha fatin hanesan, Membru Ezekutivu BNCTL, Joaquim dos Reis Martins hatete, pagamentu ba Bolsa Méritu ba estudante matenek sira hala’o tuir faze.
“Pagamentu ba Primeira faze ita liquida tiha ona, segunda faze ita remata hotu ona, ho kuantidade ba segunda faze nia hamutuk, 190.10 benefisiáriu ho nia total orsamentu ne’ebé halo transferénsia hamutuk $ 152.000.550, osan sira ne’e hotu kréditu hotu tiha ona ba benefisiáriu ida-idak nia konta agora daudaun sira halo hela levantamentu namanas hela, “dehan Joaquim.
Nia esplika, ba terseiru faze nia sei halo akordu, tanba sei rezolve tiha ho ministériu edukasaun, nune’e BNCTL hein de’it instrusaun de pagamentu, bainhira Ministériu Edukasaun haruka ona instrusaun ba BNCTL sei imediatamente halo pagamentu.
“BNCTL hanesan ajente pagadór ita hein de’it kuandu instrusaun sai dehan halo pagamentu ita halo pagamentu hanesan buat ne’ebé halo tiha ona iha Primeiru ho segundu faze, “dehan nia.
Alende Membru Ezekutivu BNCTL, Joaquim dos Reis Martins akresenta katak, ba hirak ne’ebé mak laiha konta bankária hanesan imi (jornalista) sira hatene, tenke kompleta ID, mais konforme koordenasaun entre BNCTL ho Ministériu Edukasaun, sei rezolve iha terseiru faze tanba akordu rezolve tiha hotu ona faze tuir mai BNCTL hein de’it instrusaun husi Ministériu Edukasaun depois sei ezekuta tuir orden.
984 total views, 9 views today
Bele hare Video Seluk :
Subscribe to Timorpost
