DILI (timorpost.com) — Estudante Institutu Superior Kristál (ISC), husi Fakuldade Siénsia Saúde, Departamentu Parteira na’in-90, hala’o estajiu Pre-Klínika nesessidade bázika umana ba iha Diresaun Saúde Munisípal Dili (SMD), tinan Akadémiku 2022.
Estajiu Pre-Klínika nesessidade bázika umana ho ninia tema mak, “Aprende hodi kompriende, serbisu ho kualidade no espiritu iha área Parteira Timor-Leste”. Husi na’in-90 ne’e, sei aloka ba sentru saúde haat hanesan, Sentru Saúde Farmoza na’in-22, Sentru Saúde Bekora na’in-22, Sentru Saúde Veira Cruz na’in-23 no Sentru Saúde Komoro na’in-23.
“Ida ne’e previlejiu boot ida mai iha Saúde Munisípiu Dili, hakarak hato’o de’it ita la’ós foun, ita na’in hira iha ne’e sei serbisu hamutuk no ha’u-nia prezente sei nafatin,” diskursu Diretora Saúde Munisípal Dili, Agustinha da Costa Segurado, iha Farmoza, Sábadu (17/09).
Nia subliña, Saúde Munisípiu Dili, mak reprezenta Ministériu Saúde (MS), iha baze Munisípal ne’ebé kompostu iha pos rua, ida mak Saúde Munisípiu Dili tutela diretamente ba MS no ida mak Autoridade Munisípiu Dili.
“Tanba ne’e maka depois de diploma husi Ministeriál konjunta dezde tinan 2016 ne’ebé alterasaun iha 2018, atu nafatin hanoin delegasaun kompeténsia sira hotu hodi kuidadu saúde primariu iha Autoridade Munisípal Dili,” nia relata.
Nia dehan, buat hira mak delega tiha hanesan funsionáriu rejime espesiál, serbisu kuidadu saúde primariu, sentru saúde, postu saúde to’o atividade sira ne’ebé iha komunidade nia leet, ne’e MS entrega tiha ba Estatál.
“Funsionáriu rejime espesiál, inklui ha’u hanesan mós kolokadu ha’u mós bele destakamentu ba iha Estatál ne’ebé mai husi funsionáriu rejime espesiál, ida ne’e sei aseguradu hela iha MS,” Diretora ne’e afirma.
Nia realsa tan, programa ne’ebé fó ba autoridade katak iha pilar tolu, ida mak kuidadu saúde primariu, sekundáriu no terseariu.
Iha biban hanesan, Prezidente Ezekutivu IEC-FC, Agustino do Santos Gonçalves, hameno katak, serbisu ho profisinálizmu, serbisu tulun ema ho domin no kura ema ho orasaun. Husi ne’e husu sira mós kuidadu didi’ak sira-nia serbisu hodi hatudu profisinálizmu.
Prezidente IEC-FC, Agustino re-afirma tan, lori fundadór sira-nia naran agradese ba Diretora Munisípiu Dili no Diretór sira husi sentru sira, ne’ebé hatudu profisionalidade no pratika ne’e importante maka simu oan sira.
“Ha’u hanoin ba alin sira no oan sira iha ne’e hala’o serbisu ho seriedade hanesan Diretora hatete ona, ne’ebé regra sira iha tenke tuir, liuliu papél ba inan oan sira, ida hanesan atu bele hahoris ita-nia futuru iha jerasaun sira tuir mai mak importante,” Prezidente Agustino informa.
Nia akresenta tan, serbisu iha saúde sira ne’e importante, tan ne’e se imi laiha, ema moris foun laiha, moris foun iha maibé, moris ne’ebé ho saudavel sei iha imi nia liman.
“Ha’u tau imi-nia ulun ho neon hodi hala’o serbisu ho di’ak. Husi ne’e saida mak Imi aprende iha Kristál, hanesan mós Salejiano Dom Bosco nian ne’e mak, Domin ba joven, domin ba ema, ho ida ne’e imi sira ne’e iha etika no morál nu’udar valór ne’ebé di’ak no importante,” Prezidente IEC-FC, Agustino hakotu.
3,250 total views, 3 views today
Bele hare Video Seluk :
Subscribe to Timorpost
