DILI, (timorpost.com)— Selebrasaun eukarestia iha Sábadu kalan Aleluia nu’udar kalan haksolok no kalan ne’ebé lori salvasaun ba sarani Katólika hotu no kalan ne’ebé selebra Na’i Jesus Kristu Nia Moris hias, Jesus Kristu moris hias ona.
“Kalan ida-ne’e, kalan haksolok no kalan ne’ebé lori salvasaun ba ita hotu, ita la’os selebra de’it ka halo memoria ida kona-ba istória povu Israel nian, ne’ebé Na’i Maromak manifesta nia domin ba sira”, Padre Bernardo Pereira Domingues Paiva, hatete iha nia omília iha misa Sábadu kalan Aleluia iha parókia Sagradu Coração de Jesus, Bekora, (30/03).
Padre Administradór ne’e hatete, Páskua ida-ne’e lori ema atu hateke ba oin, tanba Na’i Jesus Kristu ne’ebé mate mai hela iha mundu hodi isin no raan atu hafoun ona sakramentu sira, hodi isin no raan no lori ita atu ba hamutuk ho Nia, lori sarani sira atu hola Nia lia-fuan sira.
“Ita sei hakotu halo promesa Baptízmu, hodi hanoin fali ita-nia Baptízmu, ho Baptízmu ita halo foun ita fó ona aliasa ba Na’i Maromak, ho Baptízmu ita hanoin fila-fali ita-nia obrigasaun nu’udar sarani no ema fiar na’in, ita sei haka’as-an no nakfila ita-nia-an husi nakukun ba naroman. Ho promesa Baptízmu ne’ebé oras-oras tan uitoan ita sei halo, lori ita sai husi nakukun laran ba naroman kmanek nian”, katak nia.
Páskua kalan ne’e hahú entrada ho liturjia roman nian, lori lilin boot, lilin sinál naroman nian no ohin lori lilin no sunu lilin hodi halo promesa, ida-ne’e momentu espesiál ida fó hanoin mai ita hotu no obriga sarani sira hotu nu’udar ema sarani no fiar na’in, no sei haka’as-an sai hanesan lilin ida iha ita-nia moris.
“Banhira ita fila husi ne’e ba ita ida-idak nia uma, ita sei haka’as-an sai lilin ida hanesan ita-nia uma-kain, banhira ita fila ba servisu fatin no iha fatin ne’ebé ita hamriik, la’o ba no tuur ou toba, ita haka’as-an sai hanesan lilin ba ita-nia maluk sira. Ohin mós ita rona Maromak Nia futar-lia, Maromak Nia fuan ne’e moris, Maromak Nia lia-fuan viva, tanba ne’e lalika baruk atu see tilun ba Nia liafuan no halo tuir ba liafuan ne’e iha o moris tomak, basá liafuan ne’e sei salva ita no lori ita atu bele moris iha dala loos, selebrasaun Páskua hodi halo tuir nafatin Maromak Nia ukun -fuan sira”, nia informa.
Tanba ne’e, amu padre ne’e husu ba sarani ne’ebé simu ona Baptízmu, ne’e signifika hola parte iha Na’i Jesus Kristu Nia terus no mate moris hias, tanba ne’e haka’as-an no hakmatek ba moris nian.
Páskua nu’udar momentu espesiál ne’eb’e akontese tinan ida dala ida, tanba ne’e nu’udar sarani haka’as-an sai lilin no sai naroman ba ema seluk, no husu Na’I Maromak Nia tulun no grasa atu selebrasaun páskua bele lori ita hafoun fila-fali ita-an no hatein liután ita-an ho grasa Maromak Nian.
Apóstolu sira-nia tauk ne’e fó hanoin mós kona-ba povu Israel nia moris, hanesan sarani hotu rona iha leiturjia 7 ne’ebé ko’alia kona-ba Na’I Maromak Nia laran luak ne’ebé hatudu ba povu Israel.
Virzila Páskua ne’ebé mundu tomak selebra daudauk ne’e sei rutina ka liturjiku Igreja nian ne’ebé klean no Santo tebes, no ba salvasaun ida ne’ebé hotu-hotu sai husi nia-uma-kain, halibur hanesan sarani no hanesan kristaun Katóliku iha fatin ida-ne’e, ho fiar ida no iha esperansa atu nune’e fila husi fatin ida-ne’e ba uma hodi lori ksolok, lori naroma no pás ba uma-kain ida-idak.
Ikus liu, Maromak hatudu Nia domin ba oan sira, haree katak aliansa ida ne’ebé Maromak halo ba povu Israel, aliansa ne’e povu Israel laran toos tebes atu halo tuir Maromak Nia liafuan sira. Tanba haree ida-ne’e Na’i Maromak hatudu nafatin Nia domin haruka Nia oan mane mai iha mundu, mai atu salva ema hotu hodi Nia isin no hodi Nia raan salva ema hotu, hodi hatutan no kesi fila-fali aliansa ne’ebé kotu, banhira Maromak hatudu Nia-an ba povu Israel, Ida-ne’e mak Mistériu Páskua nian, ida-ne’e mak salvasaun ita ema nian.(*)
774 total views, 3 views today
Bele hare Video Seluk :
Subscribe to Timorpost
