DILI (timorpost.com) — Ministru Interior (MI), Francisco da Costa Guterres, hatete, sei haree didi’ak atu mellora servisu no kria kondisaun ba Unidade Patrullamentu Fronteira (UPF), hodi kontrola di’ak movimentu illegal.
Governante ne’e, informa ba Timor Post, hafoin partisipa reuniaun Konsellu Ministru, diskute kona-ba estrutura orgánika Governu konstituisaun dasia, ne’ebé realiza nian iha Palasiu Governu, Segunda (24/07).
“Ministeriu iha ona planu, depois tinan lima maka ita prepara kondisaun tau iha ne’ebá para sira atu hala’o sira nia kna’ar ho di’ak liu”, nia promete.
Nia hatete, kondisaun sira ne’ebé Ministériu Interior, atu tau ba UPF ligadu ba rekursu umanu ka pesoál UPF ne’ebé limitadu, entaun difisil atu bele kontrolu fronteira rai maran.
“Rekursu UPF ne’e, ita sei haree, depois ita sura rasio luan fronteira ho ita nia efetivu UPF nian, maka presiza rekursu hira tan”, nia hateten.
MI mós sei haree husi estudu rasio ne’e, atu bele define mós iha area fronteira hodi kontrolu efetivu, presiza postu hira tan maka monta iha ne’ebá. Tanba ne’e maka MI sei haree didi’ak no kompleta uitoan-uitoan, depois tinan oin mai maka bele kompleta, kondisaun UPF nian atu bele kontrolu di’ak movimentu ilegál iha fronteira.
Antes ne’e, Ministériu Interior (MI), sei kria polítika atu reforsa kapasidade kontrolu iha fronteira terestre, nune’e bele evita movimentu ilegál.
Ministru Interior (MI), Francisco Guterres, informa ba jornalista sira, hafoin partisipa iha reuniaun ordináriu Konsellu Ministru (KM), ne’ebé realiza iha Palasiu Governu.
“Atu trava ema ilegál iha fronteira, ita sei iha polítika hodi reforsa kapasidade kontrolu fronteira, Polísia Unidade Patrullamentu Fronteira atu halo kontrolu ne’ebé rigorozu ba ne’ebá,” nia hateten.
Nia promete katak, sei haree mós kestaun kulturál povu sira hela iha fronteira entre nasaun Timor-Leste ho Indonézia nian. Governu da-sia hakarak fronteira terestre entre rai-rua tenke ho seguransa ida ne’ebé maka pás hodi fó benefísiu ba komunidade.
“Ita haree mós kona-ba kestaun kultura entre nasaun rua, tanba ita hakarak fronteira ida ne’ebé maka seguransa iha pás, más fronteira ida ne’ebé bele benefísiu ba komunidade rua”, nia esplika.
Tanba komunidade sira hela besik iha fronteira entre rai-rua, iha lasu kulturál, nune’e tenke dezenvolve mekanizmu atu sira iha kontaktu di’ak hodi benefísiu sira nia interasaun entre komunidade iha nasaun rua ne’e.
“Uluk ita halo ona más depois la kontinua, agora ita tenke hahú fila fali mekanizmu sira ne’e”, nia konta.
Mekanizmu maka hanesan uluk implementa maka (Border Pass), presiza haree fali duke uza pasaporte, di’ak liu uza mekanizmu simples hodi ajuda komunidade iha nasaun rua ne’e.
Governu ida ne’e iha hanoin, atu kontinua ho mekanizmu (Border Pass), atu fasilita komunidade iha rai-rua liuliu iha area fronteira terestre, nune’e bele uza hodi la’o ba mai, atu evita movimentu ilegál.
1,527 total views, 6 views today
Bele hare Video Seluk :
Subscribe to Timorpost
