DILI (Timorpost.Com)—Parlamentu Nasionál (PN) liu husi Komisaun C trata Asuntu Finansas Públika, Cedelizia Faria dos Santos husu Banku Sentrál Timor-Leste (BCTL) presiza halo sosializasaun kle’an ba osan-falsu ne’ebé daudaun ne’e kontinua sirkula.
“Agora oinsá maka banku sentrál halo sosializasaun ida barak liu, hodi buka meius oioin para bele halo sosializasaun ba ita-nia povu sira para atu koñese loloos osan falsu ne’e mak ida ne’e. Para bainhira ita hetan karik ita ba merkadu ka kioske ruma ita bele informa polisia ka autoridade lokál sira hodi bele tranzmite filafali autoridade kompetente,” esplika Prezidente komisaun C trata Asuntu finansas públika, Cedelizia Faria dos Santos ba jornalista iha PN, Kinta (04/04/2024)..
Nia hatutan, Banku Sentrál Timor-Leste (BCTL, sigla portugés) tenke servisu makaas liután no tenke iha kolaborasaun di’ak ho autoridade seguransa hanesan Polisia Nasionál Timor-Leste (PNTL) hodi atensaun ba aktu sira ne’e.
Autoridade lokál mós tenke ativu hodi fahe informasaun ne’e ba públiku hodi nune’e populasaun iha area rural bele komprende diferensa husi osan orijen no falsu ne’e rasik.
“Ha’u hanoin ida ne’e perigu tebes ba ita-nia nasaun, primeiru ita uza dolar Amerikanu ne’ebé maka osan ne’e la’ós ita-nia maibé nasaun seluk nian. Karik ita ko’alia kona-ba osan surat-tahan sira ne’e, maibé ita ko’alia kona-ba osan centavu ne’ebé tuir informasaun fó sai osan falsu sira ne’e barak liu mak ida 0.50 centavu, informasaun balun ami rona dolar amerikanu balun mós ema halo hotu falsu,” esplika nia.
Nune’e mós, Membru Komisaun C trata asuntu Finansas públika, Maria Angelina Sarmento, hatete daudaun ne’e Parlamentu Nasionál liuliu komisaun C seidauk simu relatóriu ruma husi Banku Sentrál Timor-Leste.
“To agora ami seidauk simu relatóriu formal husi Banku Sentrál kona rumoris ga informasaun ne’ebé mak espalla iha públiku kona ba osan falsu ne’e, maibé ha’u fiar katak Banku Sentrál oras ne’e halo ona estudu ou peskiza hodi buka hatene kona ba sirkulasaun osan falsu ne’e,” hateten nia.
Nia hatutan, ho sirkulasaun osan falsu ne’e Timor Leste tama ona ba iha krime fiskál tanba autór sira espalla ona osan falsu ne’ebé la iha koñesimentu husi estadu ida ne’e.
“Ita tama ona iha krime fiskál nian tanba nia (autór) espalla osan falsu ne’ebé la’ós ita nia estadu RDTL hasai. Entaun ha’u hanoin banku Sentrál tenke hato’o relatóriu formal ida se karik sira iha ona peskiza tanba ida ne’e ita foin rona informasaun husi públiku,”
Tuir nia katak Timor-Leste iha entidade sira ne’ebé tenke halo peskiza ka halo investigasaun ba kazu sira nee, atu nune’e bele fó informasaun ida ne’ebé mak klaru no mós tuir dalan ne’ebé mak legal atu hato’o mai komisaun C.
Antes ne’e, Banku Sentrál Timor-Leste (BCTL), fó sai ona katak iha osan falsu centavo 0,50 hamutuk 320 moeda, ho montante 160.00 USD, husi instituisaun finanseiru sira hanesan BNCTL, Mandiri, BNU no seluk tan.
2,220 total views, 3 views today
Bele hare Video Seluk :
Subscribe to Timorpost
