DILI, (timorpost.com)– Komandante Jerál Polísia Nasionál Timor-Leste (PNTL), Komisáriu Polísia, Henrique da Costa, hatete kontrusaun ba edifísiu Komandu PNTL munisípiu Dili inklui edifísiu ba eskuadra postu 3 iha Dili hanesan Cristu Rei, Na’in-feto no Vera Krus, daudauk ne’e sei iha prosesu hela.
Nia dehan, eskuadra Dom Aleixo remata ona, hein atu utiliza de’it, no edifísiu ne’e sai perioridade ba komandu no mós prioridade Governu nian, liuliu ba Ministru Interiór no ekipa tékniku sira mós hala’o hela prosesu ne’e.
“Informasaun husi komandante PNTL Munisípiu Dili katak iha semana kotuk ne’e ekipa tékniku husi Ministériu Interiór mai ona foti sample rai nian, atu nune’e lori ba haree iha laboratóriu kona-ba estrutura rai nian, oinsá atu halo ita-nia komandu munisípiu, tanba ita lakohi depois halo ita edifísiu la tuir nia regras ne’ebé mak iha, dalaruma harii tiha tinan ida hanesan ne’e nia bele tuun fila-fali, tanba ita hatene katak Kaikoli ne’e iha bee leten, tanba ne’e ita husu para atu tau atensaun ba ida-ne’e”, informa Komandante Jerál PNTL ba jornalista sira iha Komandu PNTL munisípiu Dili, Kinta, (22/02).
Komisáriu ne’e esklarese, kona-ba eifísiu Dom Aleixo ne’e sei hein kuandu remata ona kompaña entrega ba Governu, depois Governu liuhosi Ministériu Interiór entrega ba komandu hodi uza.
Nia espera, molok tama 27 Marsu ne’e bele simu ona edifísiu eskuadra Dom Aleixu para sai hanesan prezenta ida husi Governu ba komandu munisípiu Dili, liuliu ba eskuadra Dom Aleixo, tanba eskuadra Dom Aleixo bele sai mós hanesan ezemplu ida ka modelu ida ne’ebé mak tuir planu Governu nian sei harii mós iha eskuadra sira seluk, no nia medida ne’e mak dalaruma diferente.
Kona-ba orsamentu ba konstrusaun edifísiu eskuadra Dom Aleixo, Komandante Jerál ne’e la hatene tanba ne’e kompeténsia Ministériu Interiór mak hatene.(*)
2,910 total views, 3 views today
Bele hare Video Seluk :
Subscribe to Timorpost
