DILI, (timorpost.com)– Tribunál Judisiál Priméira Instánsia Díli (TJPID) liuhosi prosesu priméira interogatóriu deside aplika medida kaosaun Apresentasaun Periódika (AP) ba arguidu ho naran inisiál PC tanba deskonfia komete krime obstrusaun autoridade públiku.
Tuir defeza ba arguidu, Defensór Públiku, Huberto Alves, hatete, kazu priméira introgatóriu ne’ebé deskonfia involve husi arguidu PC ne’e, desizaun hala’o tiha ona iha loron 24 fulan-Janéiru maibé despasu ba desizaun mak foin hatuun ohin Kinta, (25/01).
Tuir defeza ne’e, liga ba kazu ne’e Ministériu Públiku akuza arguidu ho krime obstrusaun autoridade públiku ne’ebé previstu iha kódigu prosesu penál.
“Iha despasu ba desizaun priméiru interogatóriu ne’e tribunál deside aplika medida koasaun ppresentasaun periódika ba ha’u-nia kliente, kada fulan ida apresenta-an iha eskuadra PNTL ne’ebé nia hela besik hodi hein prosesu investigasaun ba kazu ne’e,” dehan Defeza ba arguidu, Defensór Públiku, Huberto Alves, ba Timor Post iha TJPID, Kinta, (25/01).
Defeza ne’e hatete, iha sala audénsia konfesa no deklara katak, faktu ne’ebé Ministériu Públiku akuza ba nia laloos tanba momentu ne’e nia la involve iha kazu ne’e.
Defeza ne’e mos esklarese katak, iha Ministériu Públiku alegasaun ne’e husu ba Tribunál atu aplika medida koasaun apresentasaun periódika ba arguidu atu nune’e hein prosesu investigasaun.
Enkuantu pelu kontráriu, defeza ba arguidu husu tribunál atu aplika medida Termus Indentidade Rezidénsia ( TIR), ba arguidu tanba bazeia ba arguidu nia deklarasaun katak faktus ne’ebé Ministériu Públiku akuzasaun ba nia laloos.
“Hafoin tribunál rona tiha parte hirak ne’e tribunál intende hodi deside aplika medida koasaun apresentasaun periódika ba arguidu PC, kada fulan ida apresenta-an dala ida iha eskudra PNTL ne’ebé besik nia hela fatin,” nia defeza.
Entretantu, kazu ne’e akontese iha loron 20 fulan-Janéiru iha área Hudi-Lara, suku Bairru-Pite, postu administrativu Dom Aleixo, munisípiu Dili.
Hafoin akontese tiha problema ne’e, polísia kaptura kedas arguidu PC iha área refere hodi submete ba iha sela Komandu PNTL munisípiu Dili, hodi kumpri oras 72, hafoin submete ba iha Priméira Introgatóriu iha Tribunál Judisiál Priméira Instánsia Díli.
Iha prosesu priméiru introgatóriu ne’e prezide husi Juis Albertina Neves, Ministériu Públiku reprezenta husi prokuradór, Pedro Baptista, arguidu hetan asisténsia legál husi Defensór Públiku Huberto Alves.(*)
906 total views, 3 views today
Bele hare Video Seluk :
Subscribe to Timorpost
