DILI (timorpost.com)—Observadór Universidade Nasionál Timor Lorosa’e (UNTL), Júlio Aparício, hatete Timor-Leste agora hanesan observadór iha Association of Southeast Asian Nations (ASEAN), bainhira atu adere presiza hadi’a setór Seguransa.
Nia hatete, atu sai membru ASEAN la’ós buat fasil ida, ne’e katak nasaun seluk iha direitu atu mai iha Timor, oinsá Timor-Leste nia preparasaun hodi adere ba ASEAN, liuliu iha parte seguransa nian tenke garante estabilidade iha rai laran.
“Ita tenke iha seguransa hodi garante pás no estabilidade, tanba investor barak mai sei hakarak mai investe iha Timor-Leste”, nia hato’o asuntu ne’e ba Timor Post iha knar fatin Kampus Lama Kaikoli, Kinta (11/05/2023).
Tanba ne’e, nia husu governu presiza haree asuntu seguransa, ne’e importante tanba ema atu mai investe iha setór edukasaun, turizmu no seluk tan, maibé dahuluk sei haree oinsá ho seguransa iha rai laran.
Kestaun Seguransa, ne’e la’ós iha de’it sira ne’ebé servisu iha instituisaun PNTL ho F-FDTL, maibé iha timoroan hotu nia responsabilidade, liuliu joven sira.
“Tanba ne’e ita hakarak sai membru ASEAN, ita tenke kria kondisaun ba povu liuliu ba joven sira, atu sira bele partisipa iha ASEAN”, nia rekomenda.
Aleinde ne’e, Tuir nia, atu sai membru ASEAN ne’e ema hakarak hetan benefísiu husi ne’e, entaun Timor-Leste tenke prepara rekursu umanu liuliu iha area edukasaun hodi prepara joven sira hodi bele kompete ho nasaun sira hanesan Singapura, Malázia, Tailándia, Indonézia no seluk tan.
Fó hanoin fali katak, iha loron rua liubá, Reprezenta Estadu Timor-Leste, Primeiru Ministru, Taur Matan Ruak, partisipa iha simeira ASEAN ba da-42 iha Labuan Bajo Nusa Tenggara Timur (NTT) Indonézia.
Iha enkontru refere, Xefe Governu hetan mós akompañamentu hosi Ministra Negósiu Estranjeiru no Kooperasaun, Adaljiza Magno, Embaixadór Timor-Leste ba Indonézia, Filomeno Aleixo da Cruz, Diretora Jerál ba ASEAN no Xefe Gabinete Primeiru-Ministru nian, Dr. Azevedo Lourenço da Costa Marçal.
3,744 total views, 3 views today
Bele hare Video Seluk :
Subscribe to Timorpost
