BAUKAU (timorpost.com)- Igreja husu ba lider Partidu Polítika sira, katak bainhira povu fó fiar iha eleisaun parlamentár 2023 ne’e, tenke assume responsabilidade hodi lori povu no nasaun ne’e ba oin.
Amu Pároku Parókia Sta. Terezinha Menino de Jesus Kelikai, Padre Justiniano de Sousa SDB, husu ba partidu ida ne’ebé kaer ukun hodi lidera nonu governu tenke lider ida ne’ebé hakuak ema hotu, hadomi nasaun no povu ida ne’e.
“Nu’udar sidadaun ne’ebé hala’o knar hanesan Na’i-lulik hakarak hatete, rezultadu eleisaun ba see de’it mak kaer ukun hodi governa rai ida ne’e presiza hala’o ho sintidu nasionalizmu no patriotizmu, hadomi rai doben ida ne’e, hadomi mós povu hotu-hotu ne’ebé envolve an iha partidu oi-oin ne’ebé buras iha rai ne’e,” nia hateten ba Timor Post liuhosi telefone, Domingu (21/05/2023).
Nia esplika, partidu ne’ebé manan kaer ukun tenke kaer metin sintidu nasionalizmu no patriotizmu, valores hirak ne’e sai xave importante atu bele dezenvolve nasaun ne’e ba oin.
“Lider partidu ida ne’ebé povu fó fiar, assume responsabilidade atu lori nasaun ida ne’e ba oin tanba nasaun ida ne’e hetan nia independénsia hosi ruin ho ran,” nia hateten.
Tanba ne’e, nia dehan lider partidu polítiku sira presiza tane aas valores ida ne’e, hodi labele hadomi de’it nia partidu no nia grupu.
Nia afirma nasaun ida ne’e la’o ho ninia luta, los duni iha martir lubuk ida, maibé eroi sira lubuk ida mós sei hamriik hela, nu’udar ai riin pillar importante ba nasaun ida ne’e, tanba ne’e iha sira-nia tempu bele dehan orienta jerasaun foun, lider foun ba futuru nasaun ida ne’e nian.
Iha fatin hanesan Eleitór Munisípiu Baukau, nu’udar mós Xefe Departamentu Sala Emerjénsia HoREX Baukau, Claudino Ximenes, hatete, eleisaun nu’udar dalan ida atu povu ezerse nia direitu votu hodi hili partidu ida ne’ebé sira hakarak, atu nune’e ba oin bele lori dezenvolvimentu ba povu.
“Nu’udar ema saúde, ami sujere ba partidu ne’ebé de’it mak atu kaer nonu governu, kria kondisaun hanesan fasilidade saúde atu nune’e bele hasae kualidade saúde,” nia afirma.
Nune’e nia mós husu atu hadi’a infraestrutura báziku sira hanesan halo dezenvolvimentu fízika iha baze hanesan estrada, bee moos, eletrisidade no nesesidade sira seluk ne’ebé povu ki’ik sira presiza.
Entretantu Prezidente CONISTIL (Konsellu Nasionál Izlámiku Timor Leste) munisípiu Baukau, Syamsul Bahari, hatete, partidu ne’ebé de’it mak manan atu forma governu dasiak tenke tau prioridade ba setór báziku, hodi garante prosperidade povu hotu iha Timor laran tomak tuir promesa ne’ebé halo ona ba eleitór sira durante tempu kampaña.
“Ha’u sente kontente ho eleisaun tanba tinan ne’e la’o hakmatek no sidadaun hotu ezerse nia direitu votu tuir duni oras ne’ebé determina ona, no husu ba partidu ida ne’ebé manan atu kaer governu dasiak tenke kumpre ita boot sira-nia promesa,” dehan Syamsula.
2,823 total views, 6 views today
Bele hare Video Seluk :
Subscribe to Timorpost
