Dili-relasiona ho atendementu iha postu integradu Batugade ne’ebe halo komunidade sira lamenta no ejiji ba autoridade fronteira atu esklarese ba iha publiku failansu ba pasajeirus sira ne’ebe halo movimentu kruza fronteira Mota-Ain sai ba Indonezia.
Diretor Jeral Servisu Migrasaun, Superintendente Asistente Polisia Luis Soares Barreto, hateten wainhira sistema ne’e avaria, tanba kauza husi eletrisIdade mate lakan.
“liu husi meius ida ne’e hakarak husu deskulpa ba publiku relasiona ho lamentasaun kona-ba pasajeirus sira forma ho liña naruk iha fatin klot hodi hein tanba ahi mate lakan no rede internet lento fo impaktu ba atendementu iha postu integradu Batugade, maibe ita kontinua uza manual ho secondary inspection halo identifikasaun ba pasajeiru sira to’o remata”, Luis informa via telefone iha sabadu ne’e.
Tuir nia, lolos ahi labele mate lakan, tanba jerador foun ho kapsidade ne’ebe natoon atu fornese enerjia eletridade ba komunidade sira no fo impaktu ba membru Servisu Migrasaun halo atendementu iha pontu entrada fronteira Batugade.
“Maske ahi mate no rede intenet la’o neneik parte migrasaun nafatin halo esforsu ho meius tomak hodi bele halo identifikasaun manual ba dokumentu nune’e bele fasilita movimentu ema nian no sasan merkadoria sira bele tama sai fronteira terestre inklui ajuda servisu Interpol halo identifikasaun ba dokumentu ne’ebé grava iha sistema dijital atu rezolve migrasaun ilegál ne’ebé bele sai hanesan tráfiku umanu, kombate krime husi autór rede krime organizadu sira no krime transnasionál sira seluk”, nia salienta.
Migrasaun mak hanesan autór prinsipál sira ne’ebé responsabiliza ba jestaun movimentu ema nian tanba ema hotu tenke submete ba prosesu identifikasaun hodi ajuda governu rezolve numeru fraude ba identidade no dokumentu viajen nian.
“Agora kona-ba fatin ita iha balkaun 4 tama 2 no sai 2 maibe ita hare kuandu rede internet avaria sei fo impaktu ba sistema ne’e rasik, kona-ba karimbu tama no sai ida deit ho nune’e pasajeirus sira tur fatin iha balkaun tenke priense formulariu ho pasensia hodi hein tau karimbu”, nia dehan
Komandante Luis subliña, eletrisidade mate, rede internet la funsiona ho diak, fatin klot ne’e laos imigrasaun nian servisu tanba nia parte hare deit ba tau karimbu ho sistema deit fora husi ne’e jestaun sentru integradu nian.
“Iha media sosial pasajeirus sira dehan hein to’o tuku rua ne’e los tanba autoridade fronteira entre ita ho Indonezia nian hanesan Migrasaun, Alfandega, Karantina, transporte no tranzitu sei pauza ba almosu. Maibe opiniaun publiku ita nafatin tau iha konsiderasaun nune’e semana oin hau sei koordena ho autoridade fronteira Postu Batugade ho autoridade fronteira Indonezia atu kontinua loke labele taka iha oras almosu nian”. Nia hakotu.
2,713 total views, 51 views today
